Ich Hanss von Topel^a vergich für mich und für all mein erben offenleich mit dem brief, daz ich recht und redleichen bestanden han und besten mit dem brief von den erbïrdigen geistlichen herren hern Fridreichen brobst und dem convent ze Sandpolten iren zehent gelegen ze Wasserberkch in Potenbrunner pharr, der halber gehört auf ïr prelatür und halb^b auf ïr siechambt, alz der von alter zu demselbem irm goczhaus gehört hat und noch gehört, umb sechs mutt halbs kören und halbs habern und darzü den zehent auf aim lechen daselbs umb vi^erzehen meczen auch halbs ko^eren und halbs habern, daz von dem Hayezendörffer gechauft ist, alzo beschaidenleich daz ich in den egenanten getraid mit ïrem rechten kasten meczen antwürten und geben sol in iren kasten gen Sandpölten, ze rechter zeit alz man in den und andern ïren zehent geben sol. Wer aber daz ich denselben zechent ein ander jar oder mer von in besten wolt, den schüllen si mir lo^ezzen^d in der mass alz si den einem andern^e gleichen^f pawman liessen, daz sol ich in davon geben an geva^ere.^g Wolt aber ich den nicht mer von in^h besten, so sullen si denselben zehentⁱ fürbas lazzen wem si wellen, an all mein und meiner erben i^errung, und sullen fürbaz hinz in und hinz allen^j den di denselbn zehent fürbas bestent chain^k ansprach noch vo^edrung von dezselbem zehentz wegen haben nach gebinnen vil noch benig. Teten wïr aber dez nicht, wenn si mich oder mein erben dann vodernt und manent, so sullen wïr in ainen erberen diener selbanderen mit zwain pherten^l gen Santpolten in ein erber gasthaus wo si uns hin zaigent insenten, di süllen da laisten und inligen nach dez lands recht, alz lang unz daz wïr in alz^m daz volfüren daz vo^er an dem brief geschriben stett. Darzü verpind ich mich für michⁿ und für all mein erben hinz den egenanten herren von Sandpolten umb die sechzik wienner phenning di in mein vater selig her Stepphan von Toppel järlich an sand Michels tag ze pürkrecht gedient hat von pürkrecht ekchern di gelegen sind umb Wasserberkch und am Po^etenperg oder wo^o si daselbs ligent, alz man di auch von alter dem egenanten irem goczhaus gedient hatt,^p daz ich in auch und all mein erben dieselbem sechzig phening fürbaß ewikleich in derselbem mass dienn und raichen sullen unverzogenleich; teten wir aber dez nicht, so sullen wïr in der wandel vervallen^q sein, alz versessens pürkrechts recht ist. Und daz wïr in den getraid nicht geben in der mass^r alz vo^er an dem brief geschriben stett, allen den schaden den si dann dez nement, wie^s der schad genant ist den ir ainer oder ïr sichtiger scheinpott^t pei sein trewn ungesworen und unberecht gesprechen mag, denselben schaden mit sampt dem haubtgütt süllen wïr in gänzleich widerkeren, und süllen si daz haben dacz uns unverschaidenlich und auf all dem gütt daz wïr haben, wir sein lembtig oder tad,^u und ist auch unser gütleich will und günst daz uns der herzog in Osterreich oder wer^v sein gewalt ho^ett^w darzü nätten^x sol, unz daz wïr allez daz volfüren daz vör an dem brief geschriben stet. Mit urkund dez briefs besigltn mit meim insigl; und der sach sind gezeugen her Ott von Toppel mein vetter und her Hans von Toczenpach mit ïrn insigeln di wïr fleissichlich^y darumb haben gepeten.^z Geben an Sand Johans tag ze sunbenten, nach Kristi gebürd dreuzehenhundert jar und in dem zwainundachzigistem jare.

Source Fulltext: LAMPEL, Urkunden Sanct Pölten (=FRA II, Wien 1901) S. 250-252