Urbanus episcopus servus servorum dei dilectis filiis n preposito et conventui monasterii Sancti Ypoliti per prepositum soliti gubernari, ordinis sancti Augustini, Pataviensis diocesis, salutem et apostolicam benedictionem. Sincere devocionis affectus quem ad nos et Romanam geritis ecclesiam promeretur, ut votis vestris, illis presertim per que commodum et utilitas vestri monasterii procuratur, quantum cum deo possumus favorabiliter annuamus. Exhibita siquidem nobis pro parte vestra peticio continebat, quod olim bone memorie Albertus episcopus Pataviensis provide attendens quod predictum monasterium vestrum in fructibus censibus * et redditibus suis propter maliciam temporum et ex aliis diversis causis erat adeo * graviter * depressum, quod onera vobis et ipsi monasterio incumbencia supportare nullatenus poteratis, de consilio et assensu dilectorum filiorum capituli ecclesie Pataviensis, * parrochialem ecclesiam sancti Stephani * in Hurben Pataviensis diocesis * cuius * collacio et provisio ad episcopum Pataviensem pro tempore existentem pertinebat, cuiusque fructus redditus et proventus triginta marcharum argenti secundum communem extimacionem valorem annuum ut asseritis non excedunt, vobis et monasterio vestro predicto, cuius eciam fructus redditus et proventus centum et triginta marcharum dicte monete secundum eandem extimacionem valorem annuum ut eciam asseritis non excedunt, auctoritate ordinaria perpetuo donavit et tradidit ac incorporavit et annexuit ac univit, prout in litteris autenticis inde confectis episcopi et capituli predictorum sigillis munitis, quarum tenorem de verbo ad verbum presentibus inseri fecimus, plenius continetur. Quare pro parte vestra nobis fuit humiliter suplicatum, ut huiusmodi donacionem tradicionem incorporacionem annexionem et unionem auctoritate apostolica confirmare de speciali gracia dignaremur. Nos igitur huiusmodi supplicacionibus inclinati donacionem tradicionem nec non incorporacionem annexionem et unionem predictas ratas habentes et gratas illas auctoritate apostolica et ex certa sciencia confirmamus et presentis scripti patrocinio communimus. Tenor vero dictarum litterarum talis est.³||
Nulli ergo omnino hominum liceat hanc paginam nostre confirmacionis infringere vel ei ausu temerario contraire. Si quis autem hoc attemptare presumpserit, indignacionem omnipotentis dei et beatorum Petri et Pauli apostolorum eius se noverit incursurum. Datum Rome, apud Sanctum Petrum, VII. id.^a Februarios, pontificatus nostri anno quinto. Pro G. Stephani; M. de Casanova.

Source Fulltext: LAMPEL, Urkunden Sanct Pölten (=FRA II, Wien 1901) S. 255-256