Wir Fridreich von gotz genaden brobst, ich Stepphan techant und wir der convent des goczhaus ze Sand Polten wechennen offenleich mit dem brieff, das wïr recht und redleich gegebem habem und geben mit dem brieff Hannsen von der Newnstat unserm diener‚ frawn Wëntlem seiner mu^eter zu i^er paider lebta^eg durich der treuleichen dïnst willen di uns der selb Hanns getan hatt und nach hinfu^er tuen schol, unsern weingarten mit seiner zu^egeharung. gelegen dacz Darenpach neben dez Wisenten weingarten daselbs, den her Christoff selig unser mitbru^eder zu unserm goczhaus pracht und gebem hatt, davon si uns ja^erleich an sand Michels tag in unser haus gen Wyenn raichen und gebem schullen vier wyenner phenning zu ainer gedächtnüz daz der selb weingarten zu unserm goczhaus gehart hatt und nach woll darzue wecha^emen mag, alzo weschaidenlich: ob der egenant Hanns ein edleich hausfrawn nëmb und leiberben pei i^er gewu^enn, darauf sol der egenant weingarten nach seinem und der vorgenanten seiner mu^eter tad erbem und gevallen. Gieng si aber ab mit dem tod daz er nicht leiberben pei derselben seiner hausfrawn gewu^enn, sö sol der egenant weingarten uns und unserm goczhaus wider ledig sein und gevallen an allew i^errung. Wer aber das si ein natt angieng das si den weingarten verkaufen muesten, so schullen si uns den^a vor aller meinkleich anpieten und zu kaufen gebem nach zwair erberer umbsessen ratt dacz Darenpach, di zu weingart paw woll chünnen. Wollten wïr aber dez nicht kaufen, so mügen und süllen si allen ïren frumb damit schaffen, wie in daz aller pest fuegund ist. Und sein auch des ir recht geberen und scheremb für all ansprach und fordrung, als landes^b und pürkchrechtz recht ist zu Osterreich. Get in daran nicht^c ab mit recht, daz süllen si haben dacz uns und auf unsers goczhaus gu^ettern. Mit urkund dez brieffs versigelten mit unsern zwain grassen anhangunden insigel. Gebem am Freitag nach sand Philipps und sand Jacobs tag, nach Christi gepu^erd dreuzenhundert jar und in dem funf und achzigisten jar.

Source Fulltext: LAMPEL, Urkunden Sanct Pölten (=FRA II, Wien 1901) S. 270-271