Ich Niclau Rust, Hedweichs son und all mein erben verjechen und thun khund offenlich mit dem brief allen leiten lembtigen und khinftigen umb den hof ze Stetten, der ee gewesen ist Wolfhartz des Mayrs dem gott genad, das ich furpaß, ich und all mein erben da gegen nimermer ze sprechen noch ze reden sollen haben clain noch graß, vill noch wenig, weder mit recht noch on recht, und geen dem erwirdigen herrn dem brobst zu Sand Polten noch geen Herman dem Juden oder wer den hof inne hat. Wär aber das wier ich oder mein erben firpaß gegen irem ieglichem gegen dem egenanten herren oder gegen dem Juden oder wer den hof inne hat, oder gen dem hof oder von des hofs wegen mit aller seiner zuegehorung icht ze reden oder ze sprechen hieten, und das nicht stät hielten, als eben in dem prief geschriben stet, und das uberfueren, so wern wier, ich vorgenanter Nicla und all mein erben, wer purkhgraf ze Lempach ist‚ verfallen an gnad all unser hab‚ wo wier die haben, und sol und mag uns und unser leib und guet darumb anvallen und halten, unz^a das das volpracht wirt und stöt pleib das oben in dem prief geschriben stet; das lub wier inn mit unsern treuen stät ze haben. Und daruber so geb wier inn, ich obgenanter Nicla von Rust und all mein erben dem vorgenanten erwirdigen herrn dem brobst zu Sant Pölten und Herman dem Juden oder wer den hof inne hat‚ den prief zu ainem offen urkhund der sach und der handlung versigelt mit meinem anhangunden insigl. Der taidung und der sach sint zeug Erhart von Rust² mit seinem anhangunden insigl im ane schaden. Der prief ist geben ze Lempach, nach Christi^b gepurd 1386^ten jar‚ an sant Veits abent.

Source Fulltext: LAMPEL, Urkunden Sanct Pölten (=FRA II, Wien 1901) S. 280-281