Ich Weykhart von Toppl hofrichter in Osterreich vergich, das fur mich kham in das hoftaiding, da ich saß an ainem rechtn, Alber der Sicherpekh und khlagt mit vorsprechen hintz dem erwirdigen herrn herrn Dietmarn, probst zu Sant Pölten, umb ain wiß gelegen ze Sicherpach, das er der von seines geschafts wegen entwert wer worden mit gwalt. Da kham der egenant her Dietmar probst dacz^a Sant Pelten fur recht und zaigt sein brief, der sagt das di selbig wiß da im der eegenant Alber der Sicherpekh umb zuespräch, sein wer und gehort in sein hof der da haist der zechent-hof gelegen ze Sicherpach, und pat da fragen mit vorsprechen nach seines briefs sag, was nu recht wär. Da ertailtn di landherrn und geviel im auch mit frag und mit urtail: seit der egenant her her Dietmar brobst ze Sandt Pölten sein brief uber di egenanten wiß gezaigt hiet, der da sagt das di selbig wiß sein wër, es solt fürpaß der oftgenant her her Dietmar probst^b dacz^c Sant Pölten ledig frei und beruebt pleiben vor der ansprach, und sol in auch mein her der herzog darauf schirm, oder wer an seiner stat gewalt hat in dem lande ze Osterreich. Mit urkhund des briefs, geben ze Wien,^d des mitichens nach Reminiscere, im 1387^ten jare.

Source Fulltext: LAMPEL, Urkunden Sanct Pölten (=FRA II, Wien 1901) S. 289-290