Wier Fridreich von gots genaden brobst ze Sant Pöltn bekhennen und thun khunt offenlich mit dem brief, das fur uns khomen ist der erber Erhart von Altmansdarf von des hofs wegen gelegen daselbst ze Altmansdarf mit seiner zuegehörung und umb ein holz gelegen an dem Heyperg, das alles von uns und dem egenenten unserm gotshaus lechen ist, das er das frawen Geyseln seiner hausfrawen ze morgengab in satzesweise gemacht hat nach irs morgengab brief sag, den si von im daruber hat, und pat uns vleissig, das wier ir die selben gueter in satzes weise verlichen; das haben wier gethan und bestetten ir die mit dem brief, als morgengab in satzes weise recht ist und des landes recht in Osterreich. Mit urkhund des briefs besigeltn mit unsern anhangunden insigl,² geben an sant Tomanstag vor weinachten, anno domini 1387^do etc.

Source Fulltext: LAMPEL, Urkunden Sanct Pölten (=FRA II, Wien 1901) S. 295-296