Ich Elspet Wernharts sêlig witib von Weydörn, ich Jacob ir sün, ich Anna, ich Chünigund, ich Elspet, ich Margret und ich Kathrei ir töchtêr und all unser erben vergehen offenlich mit dem brief, das wir recht und redlich verchaüft haben alle unsrew recht wie die genant sind, die wir gehabt haben oder haben wolten an den zwain höfen mit aller zügehorung, gelegen dacz Weydörn in Sandpölten pharr, umb zwainzig phunt wiennër phenning der wir genzlich verricht und gewert sein von den erwirdigen geistlichen herren hern Gerungen probst und dem convent ze Sandpölten ze rechten tegen und an all scheden, also beschaidenlich daz wir fürbas hinz in oder wem si dieselben zwen höf verchaufent oder gebent von der rechten wegen die wir daran gehabt hieten oder haben wolten, dhain ansprach noch vodrung haben noch gewinnen, vil noch wenig. Wêr aber daz wir in oder ander laut von unsern wegen an den selben zwain höfen mit ir zugeho^erung chrieg invêll und irrung daran têten oder tün wolten, allen den schaden den si des nement, wie der schad genant ist‚ daz sullen si haben dacz uns unverchaidenlich und auf all dem güt, wie daz genant ist, daz wir haben oder noch gewinnen, wir sein lebentig oder tod. Mit urkund des briefs den wir in daruber besigiltn geben, mit der erbern insiglen Pawlen dez Hawshaimêr amptman ze Sand Pölten und Hansen des Pflügler purgër daselbs, die wir vlizzeclich daru^emb gepeten haben, daz si der sach gezeugen sind mit irn insigilen in an schaden; wann wir selb aigener insigilen nicht enheten. Darümbe wir uns mit unsern trewen an aidestat ünder derselben zwair insigl verpinden, alles daz gënczlich ze haben, das vor an dem brief geschriben stet, der geben ist an suntag vor sand Michelstag, nach Kristi gepürde dreuzehenhundert jar und in dem ainem und neunzigistem jar.

Source Fulltext: LAMPEL, Urkunden Sanct Pölten (=FRA II, Wien 1901) S. 340-341