No. 331. 1458. 1. Nov.

, . Wir von gots gnaden Friderich herczog zcu Sachssen, des heiligen Romschen richs erczmarschalck vnd kurfurste, lantgrave in Doringen vnd marggrave zcu Mis sen bekennen für vns, vnser erben vnd nachkomen vnd wollen das offenbar sie mit disem vnscrm brive allen vnd {glichen iczund lebenden vnd zukunfftigen luten, die yn sehen hören ader lesen werden. Nach dem wir von angeborner gute vnd mil- dickeit schuldig sint, vnser stat Lipzk vnd ire innwoner vmb irer getrewen dinste willen, die sie vns manigfeldiclich erceiget haben, in besser wesen zubrengen, haben wir von eigenem bewegnisse vnd mit wolbedachtem mute, rechter wissen vnd gutem furrate vnser herrn graven ritter manne vnd vnser rete vnd lieben getrewen von besundern vnsern gnaden der selben vnser stat vnd iren inwoiiern vmb gemeyns nutzes vnd fromens willen vnd darumb, das sie sich gebessern, auch in gedyen vnd guten stant körnen, sich uß schulden entheben vnd vns vnd vnsern erben furtmehr zcudyenen desto bereyter vnd williger werden mögen, gnediglich gegunst, zcu gege ben vnd vorliehen,,das sie vnd ire nachkomen nu furbaßmehr zcu ewigen zcyten alle iar ierlich eynen iarmarckt in derselben vnser stad Lipzk vff den heiligen newen iars tag an zcugehn, der bestehende bleiben sal biß vff der heiligen dreyer konige tag nehst darnach volgende den tag gancz yß, gunnen geben, vnd verlihen yn den also kegenwerticlich von vnser fürstlichen gewalt vnd macht in vnd mit crafft dis brives, denselben iarmarckt wie obiu berurt ist hinfur zcu ewigen zcyten in dersel ben vnser stad vff die egedachte zcyt ierlich zcu haben vnd zcu halten mit kauften vnd verkauften vnd kauffslagen alle der stucke vnd hantirung, die von kauffman- schacze vnd allen ändern dingen darbracht gefurt vnd getragen -werden, des wir vnd sie auch mit allen vnd iglichen rechten freiheiten vnd gewohnheiten gebruchen sallen vnd mögen nach wise forme vnd maße, wie das mit farmarckten in ändern vnsern steten vnser lande vnd furstentumb von alder bißher gehabt vnd gehalden ist wur den vnd itzund noch gehalden wirdit, von vns vnsern erben vnd nachkommen vnd sust allermenniglich vngehindert, doch vns denselben vnsern erben vnd nachkommen alles dinges vnschedelich an vnsern rechten in derselben vnser stat bißher gehabt,

— 263 —

• '' * .£ '.

bestetigen yn hie mit den selben iarmarckt, also genczlich ane geverde. Vnd begeren hieruff in vlisse von allen vnd iglichen prelaten, vnsern graven herren amptluten rittern knechten richtern geswprnen reten burgermeistern gemeynen vnd inwonern vnser stedte merckte vnd dorfer vnd sust allermenniglich .von den vnsern ernstlich begerende vnd gebietende, das ir die vorgnanten vnser burger vnd Inwoner der selben vnser stat Lipzk, auch alle ander kaufflute vnd igliche personen, die den gnanten iarmarkt als oben berurt ist besuchen, darzcu körnen, die zcyt doselbfest beharren vnd auch do von wandern werden, an iren personen kaufnianschacz vnd gute in eynichen Sachen wider recht nicht hindert betrübt ader beleidiget, also lib euch sie vnser vnser erben vnd nachkomen große, vngnade vnd pene zcuuormeyden. Hie mit sollen die iarmerckte, die sie vormals ierlich in vnser stad Lipczk gehabt vnd gehalten, haben, nicht abgestalt sin, sundern iren furgang haben vnd creffrig sin vnd bliben, inmassen die herkomen sint vnd sie herbracht haben ane geuerde. Zcu Urkunde haben wir vnser fürstlich groß maiestat insigel au disen vnsern briff wis sentlich laßen hengen, der gegeben ist zcu Rochlitz am mitwochen Maller heiligen tage nach gots geburt tusend vierhundert darnach in dem achtvndfunffzigsten iare. Hie bey sint gewest als gezcugen vnsere rete heymlichen vnd lieben getrewen er Hyl- debrant vom Eynsidel ritter obermarschalck, er Nickel von Schonberg ritter hofe- meister, er Georgius von Hugewitz techand zcu Missen canzler je., Otto Spigel, Hugk von Tubenlieym vnd ander vnser manne vnd dyener gnug, den wol zcu glowben stet.' .

Nach dem Abdruck im Bericht d. deutschen Gesellschaft zu Leipzig 1836 S. 31 — 33, an einigen Stellen berichtigt nach einer Abschrift aus dem 16- Jahrhundert im K. Haupt-Staatsarchiv zu Dresden.