Wir Wenczlaw von gotes genaden Romischer kunig zu allen czeiten merer des reichs vnd kunig zu Beheim bekennen vnd tun kunt offenlichen mit diesem briue allen den, die in sehen oder horen lesen, das vor vns komen ist der erwirdig Johans bischof zu Meissen vnser vnd des reichs furst vnd lieber andechtiger, vnd bate vns mit fleizze, das wir im seine vnd seiner kirchen vnd stiftes zu Meissen fursten- thumen, herlikeit vnd lehen mit allen iren furstlichen rechten gerichten czollen lehenen manscheften eigenscheften steten slossen landen luten gutern vnd allen zugehorungen zureichen vnd zuvorleihen gnediclichen geruchten. Des haben wir mit wolbedachtem mute rate vnser fursten, edlen vnd getrewen im seine furstenthume, herlikeit werltlikeit vnd lehen seiner egenanten kirchen vnd stiftes zu Meissen mit allen iren furstlichen rechten gerichten czollen lehnen manscheften eigenscheften steten slossen landen luten gutern vnd allen iren zugehorungen als vorgeschriben stet, wie die mit sunderlichen worten genant sein, gnediclichen vorlihen vnd gereicht, vorleihen vnd reichen im die in craft dicz briues, rechter wissen vnd Romischer kuniglicher mechte volkomenheit. Vnd derselbe vnser furste hat vns doselbst gelobt vnd gesworen, vns vnd dem heiligen Romischen reiche getrew gehorsam vnd vnder- tenig zu sein, vnser fromen zu werben vnd vnsern schaden zu wenden, als das

259

gewonlichen vnd billichen ist, vnd als er das vns vnd dem reiche von einen solclien furstentum von rechtes vnd gewonheite wegen zutun pflichtig ist . Dorumb gebiten wir allen vnd iglichen mannen rittern knechten hauptluten gemeinscheften der stette, merkte vnd dorffer, vnd allen andern gemeinlichen vnd sunderlichen in welcherley adel eren wirden oder wesen die sein, die in dem vorgenanten seinem stifte zu Meissen wonhaftig vnd gesessen sein, ernstlichen vnd vesticlichen bey vnsern vnd des reichs hulden, das sie sich an den egenanten bischoff vnd an nymanden anders keren vnd im vndertenig sein sollen, vnd ouch hulden geloben vnd sweren als das billichen vnd gewonlichen ist, als irem rechten ordenlichen naturlichen vnd elichem herren, vnd sich dowider nicht seczen mit worten noch mit werken in dheynerweis, als sie vnsere vnd des reichs swere vngenade vermeyden wollen. Mit vrkunt dicz briues vorsigelt mit vnserm kuniglichen maiestat insigel, geben zu Prage noch Crists gepurte dreiczenhundert iar vnd dornach in dem dreyvndnewnczigistem iare des vrey- tages noch sand Peters vnd sand Pauls tage vnsrer reiche des Behemischen in dem eynvnddreissigistem vnd des Romischen in dem sibenczehenden iaren.

Per dominum Johannem ducem Gorlicensem Wlathniko de Weytenmule.

Auf der Ruckseite: B. Bartholomeus de Nouaciuitate.

Nach dem Orig. im K. Haupt - Staatsarchiv zu Dresden mit dem beschadigten Majestatssiegel und Ruck- siegel an einem Pergamentstreifen.