Wir Wenczlaw, von gotis gnadin herczoge in Slczien unde herre czu Legnicz, bekennen offinbar an disem brive allen den, dy nu sint adir her nach werdin, daz wir an habin geseen dy getruwen dinst, dy. uns unse burger von dem Goltberge in manchirley wyze beyde mit hulfe unde ouch mit andirm

174

dinste dicke unde ofte bewist unde getan han, unde gebin yn unde eren nach- komelingen von gnadin ewiglich alle Meydeburgische recht unde bestetegin dy in disem brive, wen sy dy zelbin recht ouch vor habin gehat, alzo daz sy dy zelbin recht, wen sy ir bedorfen, mogen unde sullen holn czu Legnicz adir czu Breslaw, wo ys yn allir fuglichst ist. Dorczu gebe wir yn ouoh, unde eren nach- komelingen, daz sy ir goltgewychte beyde kleyne unde gros gliche sullen habin, als is unse stat Legnicz hat. Czu eyme gedechtnisse dirre vorgeschreben rede zu habe wir disen brif heysen werdin vorzegilt mit unserem yngczegil, unde ist gegebin czu Legnicz an der metewoche vor dem palmetage nach gotis geburt tusunt unde dryhundirt iar in dem acht unde virczegisdem iare.