Albertus Dei gratia Dux Austrie et Stirie, Dominus Carniole, Marchie et Portusnaonis vniuersis presentibus et futuris, ad quos presens scriptum peruenerit, Salutem. Venientes ad nostram presentiam honorabiles viri Fridericus prepositus et Conuentus Ecclesie Sancti Johannis Evangeliste in Walthausen humiliter postularunt, vt ipsius gratias et libertates quasdam eisdem et Ecclesie ab Illustribus quondam Liupoldo et Friderico Ducibus Austrie recordacionis inclite predecessoribus nostris concessas liberaliter et indultas iuxta privilegiorum suorum nobis exhibitorum tenorem innouare de speciali et affluenti gratia dignaremur, videlicet, vt annona ipsorum et res alie et naues sursum vel deorsum ducende in alveo danubii a Muta in Stein et omni thelonio ac tributo excepte sint perpetuo transitu libero gauisure. Item vt de bonis et possessionibus ipsorum prouentus, qui in vulgari Marchfu°ter dicuntur, soluere minime teneantur astricti, Set eosdem suis applicent vsibus et prebende. Postremo vt nullus vmquam iudicum aut prefectorum nostrorum in Machlant et in Ciuitate nostra Laˆ aliquam sibi jurisditionem aut prouentuum receptionem aut quamcumque exactionem in prediis Ecclesie memorate uendicare debeant vel presumant, Sed potius eos, qui in dictis locis pro tempore judices fuerint, possessionibus prenotatis in hac forma debeamus constituere defensores, vt nichil ratione aduocatie nostre aut tuicionis sue pretextu a sepedictis prediis teneantur vel audeant vsurpare. Nos igitur Predecessorum nostrorum ad instar Ecclesiam prelibatam in suis juribus et gratiis fouere fauore uolentes et gratia speciali, vt et nobis bonorum operum suorum suffragia ad uite presentis comoda et eterne felicitatis proficiant incrementa, prefatas libertates, jura, donaciones et gratias sepedicto Conuentui et Ecclesie indultas, prout presentibus exprimuntur, de habundancia et plenitudine gracie specialis admittimus, approbamus, jnnouamus et presentis scripti patrocinio conmunimus. Nulli ergo hominum hanc nostre jnnouacionis paginam liceat infringere vel quomodolibet perturbare. Siquis vero in contrarium quitquam attemptare presumpserit, indignationem nostram ipso facto se nouerit incurrisse. In cuius rei testimonium et cautelam presens scriptum Sigilli nostri munimine jussimus Robare Testibus qui presentes aderant, annotatis et hii sunt vir nobilis vlricus de Toufers, viri strennui Liutoldus et Hainricus fratres de Chunring, Stephanus de Meyssow Marschalcus austrie, Fridericus dapifer de Lengbach, albero de puecheim, vlricus de Capella, Otto de volchemstorf, Chu°nradus de Capella, Johannes de Ror et Fridericus de Houseke. Datum per manus Magistri Gentzonis nostri prothonotarii in Castris apud Wernenstein Anno Domini Millesimo ducentesimo octogesimo quarto, viii°. Idus jvlii.

Source Fulltext: OÖUB 4 (Wien 1867) S. 22-23, Nr. 25