Ich Marchart von Osterberch vnd mein hausvrawe vro So^effei vnd mein svn Vlreich vnd mein Tochter Ann veriehen vnd tvent chvnt allen den, die disen Prief sehent oder horent lesen, die nv sint vnd hernach chvnfftich werdent, Daz wier mit verdachtem mvete vnd mit vnserm gvetleichem willen vnd nach vnser frevnt rat vnser rechtez aigen, daz da leit in dem Vtental, der da einz haizzet pei dem Gütern vnd einz an dem hofe in den vtental, haben Probst Gervng von Walthavsen vnd seinem Gotshause vnd seinem Convent ze chavffen gegeben vmb svbentzk phvnt phennig wienner mv^enze, der wir recht vnd redeleichen von in ze rechter zeit gewert sein, wir haben vns avch desselben Gvetes gaentzleichen verzigen, daz wir noh dhain vnser Erben, die nach vns chvnfftich werdent, fvrbaz icht rechtes daran gehaben shvllen noch mvgen. Darzv shvlle wir auch des vorgenanten Gvetes Probst Gervnges vnd seines Gotshavs ze walthavsen vnd seines Conventes gewer vnd scherm sein ze aller zeit vnd an aller stat, da in des not geschiht, als des Landes recht ist, vnd swa wir des niht entaeten also, daz in daran an vns oder an vnsern Erben, die nach vns chvnfftich sint, icht abgienge, so schvllen si haben hvndert Phvnt Phenning wienner mv^enze mit vnserm gvetleichem willen avf alle dem Gvete, daz wir haben in dem Lant ze Osterreich, swie daz gehaizzen ist. Vnd daz in div rede staet vnd vnzeprochen peleibe, dar vber geb wir dem vorgenantem Probst Gervng von walthausen vnd seinem Convent disen prief ze einem ebigen vrchvnde vnd ze einem waren zevge diser sache versigelt mit meinem Insigel hern Marcharstz (sic) von Osterberch vnd mit hern Jansen Insigel von Chappell vnd mit hern Havgen Insigel von Reichenstein vud mit hern Otten Insigel von Chornspach. Der rede sint avch gezevge die, der namen hernach geschriben stent: her Alber von volchensdorf, her hadmar von volchensdorf, her Vlrech der grvnperger, her hertneit von chv^elew, her Chvnrat von flachenek, her vreytel von winthag, Chvnrat von mitterberch, hainreich der vleischezze, Ott der wimberger, hainrech wetzel vnd wetzel von erbing, Ditmar Geyselprecht, Moeinhart von denpach vnd ander erber levt, die pei dem chavf sint gewesen vnd pei der wandlvng. Ditz ist geschehen, do von Christ gebvert ist gewesen Drewtzehen hvndert Jar, darnach in dem ayndlo^eften Jar an sand Gregorgen tag in der vasten datz walthavsen in dem Chloester.

Source Fulltext: OÖUB 5 (Wien 1868) S. 48-49, Nr. 45