Ich Gedravt von Smidach vnd Ich Ekhart vnd Ich Heinreich in Svne verriehen vnd tvn chvnt allen den, die disen prief sehent oder horent lesen, die nv sint oder hernach chvnfftich werdent, Daz wir mit verdachtem mvte vnd nach vnser frevnt rat Probst Gervngen von walthavsen vnd seinem Convent daz erberecht, daz vns anerstorben ist an dem weingarten, der do leit datz Stayn auf dem grawen vnd der do haizzet der Mitterchircher, gegeben haben redeleich vnd rechtleich vmb zwelf phvnt phening wienner mv^encz vnd sein avch der selben phening recht vnd redeleich gewert vnd wir shvllen avch des selben weingarten mit sampt vnsern nachchomen des vorgenantes probst Gervngez vnd seines Conuentez gewer sein als pvrchrechtez recht ist in dem Lant ze O^esterreich, vnd swo wir oder vnser nachchomen des nicht entaeten, Daz sol Probst Gervnch vnd sein Conuent ze walthavsen haben avf alle dev vnd wir haben in dem Machlant, swie daz haizze vnd iz sei versvcht oder vnversvcht vnd so vil mer, swer ze derselben zeit Lantrichter ist in dem Machlant, der sol dazselbe gvte Probst Gervngen vnd seinem Conuent ingeantwurten gervte vnd an allez recht als lange, vntz daz wir dem vorgenantem Probst Gervngen vnd seinem Conuent von walthavsen ablegen allen den schaden, den si mit recht naemen an demselben weingarten, vnd daz dev rede vnd daz gelvb staet vnd vnzeprochen beleibe, dar vmb geb wir in disen prief ze einem waren zevge diser Sache versigelt mit meinem des egenantz Heinreichez von Smidach Insigel vnd mit hern Jansen Insigel von Chappell vnd mit hern Marchartz Insigel von Osterberch, der ze der selber zeit in dem Machlant LantRichter was, vnd mit hern Rvgers Insigel des Alten Richter von Chremmes, der ze der selber zeit desselben weingarten Perchmaister was, vnd darzu die zevge, der namme hernach geshriben sint, Daz ist her Alber von volchenstorf vnd her hadmar sein prvder, her Hoertneit von Chv^elevb, her Chvnrat der flacheneker, her freitel von winthagen, der Heinreich von Intzing vnd der vlreich von Hovse, Dietmar von Ove, vnd Heinreich sein prvder, Ott der wimberger, Heinreich von Aerwing vnd Betzel sein prvder, waltchvne von Mitterchirhen vnd darzv ander pider Levt, den dev Sache wol chvnt ist. Diser prief ist ze walthavsen gegeben, do von Christes gepvrtte waren ergangen drevtzehen hvndert Jar, in dem ainleften Jar darnach, an dem naechsten allerheligen tag.

Source Fulltext: OÖUB 5 (Wien 1868) S. 64-65, Nr. 61