Ich vro Katherei von Wu^ennberch vergich vnd tvn chvnt allen den, die disen prief lesent oder horent lesen, die nv sint oder hernach chv^enfftich werdent, Daz ich mit verdachtem mv^ete vnd nach meiner frewnte rate vnd mit aller meiner chinde vnd meiner Erben gvteleichem willen meinen hof, der do leit datz Drozze vnd der mein rechtez aigen ist gewesen, han recht vnd redeleich Probst Gervngen vnd dem Convente von walthausen ze chauffen gegeben mit allem dem recht, vnd ich in vnd meine Erben haben gehabt peidev ze dorf vnd ze velde, vmb zehen vnd vmb hvndert phvnt phening wienner mvnczze, derselben phening habent si mich sechtzk phvnt phening gewert recht vnd gaentzleich ze der zeit, als mir wart gelobt, vnd fvr die andern fv^entzk phunt phening shvllen si mir vritz an meinen Tode ein herren phrv^ent gaentzleich geben alle jar an Ezzen vnd an trinchen. Vnd dvreh pezzer sicherhait vergich Ich dev egenant vro Kathreiˆ von wu^ennberch, daz ich mich desselben hofez mit sampt meinen Erben han recht vnd redeleich verzigen, d;iz wir furbaz daran dhain reht shvllen haben. Iz sol avch daz vorgenant Goteshovs von walthausen, dem ich vnd meine Erben denselben hof haben nach Lantzrecht ze Osterreich avf gegeben, damit seinen frvme schaffen in ze versetzen vnd ze verchavffen, swem iz welle. Vnd daz die rede staet vnd vnzeprochen beleibe, darvber gib Ich die egenant vro Kathereiˆ von wunberch dem vorgenanten Probst Gervngen vnd seinem Conventte desselben Goteshovs ze walthavsen disen prief ze einem waren zevge vnd vnd ze einem offen vrehv^ende diser sache versigelt mit hern alber jnsigel von Volchenstorf, mit hern Jansen jnsigel von Chappelle, mit hern Gvndacherz Insigel des Werder von Drozze, mit Otteinz meinez prvder des wiemberger Insigel vnd aveh versigelt mit Ottenz des Nevneker meines aidem jnsigel. Diser prief ist gegeben, do von Christes gepvrtt waren ergangen drevtzehen hvndert Jar, in dem dreitzehentem darnach an dem naechstem sand Michelstag.

Source Fulltext: OÖUB 5 (Wien 1868) S. 115-116, Nr. 114