Ich Herwort der leirperger vnd vro agnes mein Hausfrav veriehen vnd tuen chunt allen den, die disen prief sehent oder horent lesen, die nu sind oder her nach chu^enftich werdent, daz wir mit verdachtem mute vnd mit aller vnser erben guetlichem willen vnd avch nach vnser getreven vreunt rat haben vns mit Probst Gerungen vnd mit seinem Conuent datz welthausen gaentzleichen und trevlich verebent vnd verslicht vmbe die aigenschaft vnd vmbe alle die ansprach, die wir hintz in haben gehabt vmbe den hof, der da leit in dem machlant datz jnnerveld, des wier vns vnd alle vnser erben, di wier nu haben oder noch schullen gebinnen, gaentzlich vnd redlich verzigen haben nach allem lands recht in Osterrich, haben n auf gegeben also, daz si da mit iern frum schaffen ze versetzen vnd ze verchauffen, swem si wellen. Vnd dar vmbe hat vns der vargenat (sic) Probst Gerunch vnd sein Conuent von welthausen gegeben vierzig phunt phenning wiener mu^enz vnd hat vns der selben phenning redlich vnd rechtlich gebert ze rechten taegen vnd ze rechter zeit vnd durich pezzer sicherhait veriech wier dem vorgenanten gotshaus datz welthausen, daz wier des selben hofs sein geber schullen sein vuer alle ansprach vnser erben an aller der stat, da im des durft geschiecht, als lants recht ist. Vnd daz selbe schullen si haben auf vns vnd allen dem guet, daz wier in dem lant ze Osterrich haben, swi daz haizz oder gelegen sei. Si schullen auch daz selbe gelu^eb haben auf vnseren freunten, die vnser purgel sind vuer vns darumbe warten. Daz ist Her Hertneid der Chuliber vnd Helmweich sein pruder vnd mein sweher Diettrich der Reikersdorfer vnd alram sein pruder vnd Ott auch sein pruder von Reikersdorf vnd jans der Roedloer. Vnd dar zve daz in daz staet vnd vnzerbrochen weleib, geb wir in disen prief zv einem waren gezeug vnd zv einem offen vrchu^end diser sache versigelt mit meinem insigel vnd mit insigel hern Hertneits von Chu^elib vnd mit meines swehers insigel von Reikersdorf vnd mit insigel alrams seins pruders versigelt vnd westaetigt. Diser sach vnd diser wandlung sind auch gezeug di erbaern leut Her Ott der gleuzzer, der techent vnd chorrherre von ardacher, Her laurentz der pharrer von Mu^enichspach, Her Alber von volchenstorf, Her jans von Chappell, Her vlreich der Gruenpurger, Her Marichhart von Osterberch, Her Pernger von Spiegelberch, Her Hainrich von O^ede, Her Marichart sein pruder, Herr Chunrat von Flachenekk, Herr Vreitel von winthag, Her Ott von Chornspach, Her Ott der Hauser, vlrich der Hauser, Heinrich der ymzinger, Herweich der Holzer, Hainrich der stainer vnd fridreich sein pruder vnd dar zv ander erbaer leut, di da pei sind gebesen, da die verrichtigung vnd di schidung ist geschehen. Diser prief ist gegeben, da von Christ gepurd warn ergangen dreuzehen Hnndert jar, in dem Dreuzehenten jar dar nach an dem Nasten Sand Thomans tag. den man beget gemainchleichen vor den weichnachten.

Source Fulltext: OÖUB 5 (Wien 1868) S. 121-122, Nr. 120