Ich vlreich der harlunch vergich vnd tuen chunt allen den, di disen prief sehent oder lesen horent, di nu lebent oder hernach chunftig sint, daz ich mit verdahtem muet vnd mit guetem willen meiner hausvrowen vnd aller meiner erben vnd mit meines prueder Fridreiches vnd mit seiner hausvrowen vnd aller seiner erben guetlichem willen vnd mit gemainem rat aller meiner vreunt ze chauffen han gegeben probst Gerung vnd dem gotshauss ze walthausen ledichleich vnd an allen furzug, als ein man sein recht aigen furchaufen schol, ein mul, di leit ob des gotshauss auf der sedmech vnd haizzet chremleins mul, ebichleich ze haben, ze versetzen, ze verchauffen vnd allen sein frum damit ze schaffen, als ein man mit seinem rechten aigen tuen schol oder ein gotshauss, vmb vier vnd zwainzich phunt phenning wiener munz, der ich recht vnd redlich vnd mit gueter gewizzen gewert pin; darzue mit swelicher ansprach oder mit swelicherlai sachen iz wer, mit recht oder mit vnrecht, van mir oder van meinen prueder Fridreichen oder van vnsern erben oder van andern vnsern vreunten daz gotshauss an der vorgenanten mul gemuet wuerd, daz schol wir im auzrichten an allen chrieg, an alle sein mue vnd an allen seinen schaden, wer aber daz getan, daz dem gotshauss des an vns oder an vnsern erben icht abgieng, so schol iz des gotshauss voit tuen an vnser stat mit vnserm guetem willen vnd schol das vargenant gotshauss vnd sein voit daz haben auf alle dev, vnd wir in dem land haben versucht vnd vnuersucht. Daz dem oft genanten gotshauss ze walthausen die wandlung vnd der chauf stet vnd vnuercht (sic) beleib, daruber zu einer gewissen verchund vnd zu einem waren gezeug, seind ich ze der zeit beraites insigels nicht enhan, gib ich im disen prief versigelt mit hern Jansen insigel van Chappell, mit heren Marichartes insigel von Oesterwerch, mit meines prueder Fridreiches insigel, mit meines vetren Otten insigel des harlungs an miner stat. Diser sache sint gezeug her Jans van Chappell, her marichart van Oesterwercht, Ott der harlunch, Ott der wunberger, Fridreich der harlunch vnd ander piderb leut. Der prief ist gegeben, do van christes gepuerd ergangen waren tausent iar vnd drevhundert iar, darnach in dem sibenzehentem iar an vnser vrowen tag in der fasten.

Source Fulltext: OÖUB 5 (Wien 1868) S. 187-188, Nr. 189