Ich hainreich der Fleichsez vergich vnd tuen chunt allen den, di disen prief sehent oder lesen horent, di nu sint oder hernach chunftig werdent, daz ich mit verdahtem muet vnd mit guetem willen vnd mit gemainem rat meiner vreunt gesetz han probst Gerung vnd dem gotshauss ze walthausen di mul datz der hohenrinn, di vnder demselben gotshauss leit auf der sedmech, allen seinen frum damit ze schaffen, als ein man mit seinem holden, fur vierzehen phunt phening wiener munz, der ich recht vnd redlich gewert pin, vnd schol vorgenanteu mul lasen an vnser vrowen tag ze der liechtmess vnd swenn ich den tag verzich, so schol diselb mul an allen chrieg sten in demselben satz aber ein iar darzue, mit swelicher ansprach oder mi swêlicherlai Sachen der vorgenant probst Gerunch oder daz gotshauss ze walthausen an der mul gemuet wuerd van meinen erben oder van ander meinen vreunten, daz schol ich im auzrichten an allen seinen schaden vnd an aller sein mue. Daz dem oft genanten probst vnd dem gotshauss di red vnd di sach stet vnd vnuerchert beleib, daruber zu einer verchund vnd zu einem waren gezevg gib ich im meinen prief versiglt mit meinem Insigel vnd mit meiner prueder paider Insigel hartmudes vnd Fridreichs, der sach vnd der wandlung sint gezeug her Marichart van O^esterberch vnd sein sun vlreich vnd Ott der wunberger. Der prief ist gegeben, do van Christ gepuerd ergangen waren Thausent Jar vnd drevhundert iar, darnach in dem sibentzehenten iar an vnser vrown tag ze der liechtmess.

Source Fulltext: OÖUB 5 (Wien 1868) S. 184-185, Nr. 186