Fridericus Dei gracia Romanorum Rex semper Augustus Uniuersis Sacri Romani Imperii fidelibus presentes Litteras inspecturis Graciam suam et omne bonum. Accedentes nostre maiestatis presenciam Honorabiles et religiosi viri Wisento Prepositus et Conuentus Ecclesie Sancti Johannis Ewangeliste in Walthusen deuoti nostri dilecti quoddam priuilegium a diue recordacionis domino Alberto Romanorum Rege Genitore nostro karissimo ipsis innouatum, nostris conspectibus obtulerunt supplicantes nostre eminencie humiliter et deuote, quatenus idem priuilegium a predicto domino Alberto tunc in minoribus constituto indultum ipsis et concessum innouare, approbare et confirmare de benignitate Regia dignaremur. Cuius quidem Priuilegii de verbo ad verbum tenor talis est. (Nun folgt die Urkunde ddo. 8. Juli 1284.) Nos vero predictorum prepositi et Conuentus ecclesie memorate, quorum utilitates et commoda procurare et indempnitatibus ac dispendiis precauere ex iniuncto nobis Regiminis officio quamplurimum nos delectat, deuotis supplicationibus fauorabiliter inclitiati prefatum priuilegium cum omnibus articulis, Juribus, libertatibus, donacionibus et graciis in ipso contentis de plenitudine potestatis Regie innouamus, approbamus et presentis scripti patrocinio confirmamus Mandantes uniuersis et singulis, quatenus predictos Prepositum et Conuentum, quorum grauamina dissimulare nolumus, in Juribus ac libertatibus suis prefatis impedire aut grauare nullo modo presumant, sicut nostre indignacionis offensam, quam ipso facto incurrunt, voluerint euitare. In cuius nostre innouacionis, approbacionis et confirmacionis euidens testimonium Regale nostrum Sigillum presentibus duximus apponendum. Datum Wienne XVII. Kalend. Decembris. Anno domini Millesimo Trecentesimo Vicesimo primo. Regni vero nostri anno Septimo.

Source Fulltext: OÖUB 5 (Wien 1868) S. 304-305, Nr. 315