Wir der Rat von Chrems vnd von Stain veriehen an disem brif vnd tuen chund allen den, di in sehent oder horent lesen, daz ein chrig ist gewesen zwischen dem Erbern herren Brobst Wisenth von Waldhausen an ainem tail vnd Gotfriden dem armen Pilgreim vnd seiner bru^eder Chunrats vnd Pilgreim an dem andern tail vnd chrigten vmb einen weingarten an dem Gebling, der weilend ist gewesen Heinreichs dez armen Pilgreim, dem got genad; derselb chrig ist bericht gar vnd gentzlich an allez geuêrd an vnsern Rat vnd nach anderr Erberr leut rat vnd paidenthalben nach gu^etlichem willen also, daz di vorgenanten bru^eder sich furczicht habent getan dez vorgenanten weingarten, daz seu noch ir Erben nimer nie dehain ansprach sullen darauf haben Vnd sol der vorgenant Brobst wisenth vnd sein goczhous den vorgenanten weingarten furbaz haben ledichlich vnd sollen davon gedenchen dez vorgenanten Heinrichs dez armen Pilgreim vnd hern Vlrich seinez sun sel. Vnd darvber geben wir disen brif versigelt mit der stat Insigel ze Stayn zu einem vrchund vnd zu einem getzeug diser sach. Der Prif ist geben, do von christi gepurd warn ergangen dreutzehen hundert iar, darnach in dem vir vnd zwainczisten iar dez mantags vor dem Auffart tag.

Source Fulltext: OÖUB 5 (Wien 1868) S. 394-395, Nr. 397