Ich Vlrich her Nyclas aydem von Minnpach vnd kairei sein Housfrow wir veriehen an disem brif vnd tun chund allen den, die in sehent, ho^erent lesen, daz wir gechauffet haben von dem Erbern herren Brobst Wisenth von Waldhausen vnd von dem Conuent daselbs irn hof ze drozz, da in gehörnt vir vnd virczig jeuchart akcher vnd drei hofstet, do man in den hof von dint drey schilling vnd siben phening wienner Münsse vnd dreu hun. den selben hof haben wir gechauffet zu vir leiben vns vorgenanten paiden vnd vnsern zwain chinden Nyclasen vnd Agnesen Also mit bescheidner red, daz wir in dovon alle iar geben sullen êcht vnd zwaintzig wienner phenning an sand Michels tag, daz si diselben raichen sullen in gewerscheft irs gotzhous also, swann wir vorgenanten leib nicht mehr sein, so ist in der vorgenant hof ledich warn vnd swaz darzu gehört, an allen irrsal. Wir sullen auch den vorgenanten hof nicht versetzen noch verchauffen noch swaz darzu gehört zu vnserm recht, ez geschêch dann mit wizzen dez vorgenanten gotzhous phleger oder Verweser. Wir sullen auch weder êkcher noch gûld von dem vorgenanten hof verchumbern noch versetzen, nur mit willen dez vorgenanten gotzhous phleger. Wir sullen auch denselben hof vnd di gkcher haben in rechtem czeitlichem paw also, daz der hof icht zimmeruellich werd vnd auch di êkcher ieht pawloz. wo wir daz nicht stêt behalten, so ist in der hof ledich warn an allen chrig, vnd di hantfest, di wir von demselben gotshous haben, di hat dehain chraft fürpaz. Daz di red stet beleib vnd vnuerchert, darvber gib ich vorgenanter Vlrich vnd her Leuppolt, zden Zeiten Richter ze Chrems disen brif versigelt mit vnsern Insigeln zu einem vrchund vnd zu einem geczeug diser sach. Datum Anno domini M°. CCC°XXX°. primo, Egidij Abbatis et confessoris.

Source Fulltext: OÖUB 6 (Wien 1972) S. 33, Nr. 28