Ich Ott vnd Johann wilhalm di wunberger vergehen vnd tuen chunt allen den, di den prief sehent oder horent lesen, di nu lebent oder hernach chunftig sint, daz wir vns vnd vnser lebent vnd auch nach chunftig erben auzzen vnd fuerzicht tuen ledichleich alles des rechten, Des wir vns ze vnrecht vnderwunden heten, des wir ermont sein mit rethleicher gueter gewizzen vnd auch mit vnserr vodren priefen mit Stiftung, mit voktay auf einem lehen datz Guetenpach vnd haizzet an der prnntstat, vnd auf einer hofstat datz Challenperig, di ierleich an sand Michels tag sint ain phunt geltes newer wienner phenning, di vnser paider voedren gegeben habent ledichleich ze der zeit vnd si iz wol getuem (sic) mo\chten, mit guetem willen aller ierr Erben dem Goteshaus ze walthausen ze einem ebigen selgerêt mit all dem recht vnd mit alle dem nutz, vnd si di paidev guet inngehabt habent her von reût recht versuecht vnd vnuersuecht, ze dorf, ze holtz, ze velde. Daz dem voergenanten Goteshauss ze walthausen di red vnd di wandlung fuerpaz stet an allen chrieg beleib von vns vnd auch von vnsern Erben, darvber ze einer gewissen vrchund vnd ze einem waren gezeug der wandlung geb wir dem Egenanten. Goteshaus vnd der gemain des Conuentes den prif versiglt mit vnserr paider Insigel. Der sach sint gezeug her Gotfrid von Chuenrateshaim, vlreich der Chienberger, wernhart sein prueder, Herweich vnd Reinwart di richter ze Ysper vnd ander piderb laeut genueg. Der prief ist gegeben, do von Christes gepuerd ergangen waren Dreutzehenhundert jar, darnach in dem tzwai vnd dreizkisten jar an sand Jacobs tag.

Source Fulltext: OÖUB 6 (Wien 1972) S. 68f., Nr. 60