Ich Hainreich der Oeder von Chriechpaw°m vnd ich Hainreich der Oeder von Swertperch vnd ich Ott der Perchaimer vnd ich Marchart der Chirsperger vnd ich Hainreich der swainpech vnd ich wetzel von Erbing veriehen vnd tuen chunt offenleich an diesem Brieff allen den, die in lesent oder horent lesen, di nv lebent oder hernach chumftig seint, Daz wir mit uerdachtem muet vnd mit guetem willen aller vnser Erben vnd mit guetleichem willen vnd mit gemainem rat vnser pesten vreund, die dez guetz, daz her nach geschriben stet ze der zeit recht Erben geuesen seint, haben geben dem gotzhausz ze walthausen ze einem Ewigen selgeret ein guet, dez ein lehen ist vnd leit in der Pfarre ze Nern vnd haist ze wogrein, ledichleich ze haben an allen chrieg mit alle dem nutz vnd mit alle dem recht vnd wir vnd auch vnser voedern daz selb guet inn haben gehabt, da man der gemain dez vorgenanten gotzhausz ze walthaussen von dien schol alle Jar an vnser vrawen tag alz si geporn wart siben schilling Phenning, die ze derselben zeit gibich vnd gebich seint, daz seu ierchleich nach vnser vrawen tag an dem dritten tag vns vnd auch allen vnsern voedern begen schuln ein gemain Jartag mit mess vnd mit vigilij vnd mit ander geistlicher ordenung alsz ierz Ordens gewonhait ist, gescheh auer daz, dez got nicht engeb, daz die Herren dez egenanten gotzhausz ze walthaussen den gotz dienst, alz vor geschriben stet, ab liesen gen, von svelcher saumung das geschech, dez seu von vns oder von vnsern Erben mit einer warn chuntschaft ermont mochten werden, so schuln seu ainz vns gemont werden, vnd wer auer daz, daz die vorgenanten Herren ze walthaussen nah der monung daz nicht behilten, als vorgeschriben stet, so schol daz vorgenante guet ledichleich vnd gentzleich sich ueruallen haben dem gotzhausz ze Paw^engartenperg mit alle dem recht, alz seu ez gehabet haben. Daz diseu wandlung stet vnd vnzebrochen beleib, so gib ich der vorgenante Hainreich der Oeder von chriechpawm vnd ich Hainreich der Oeder von swertperch vnd ich Ott der Perchaimer vnd ich Marchart der chirsperger vnd ich Hainreich der swainpech vnd ich wetzel von erbing dem oftgenanten gotzhausse von walthaussen disen Brieff uersigelten mit vnsern Insigil ze einem warn zeug diser sache. Dez seint zeug her vreitel von winthag, Her Ott der Harlunch, Her Karl von Luffenberch, vlreich der Galzperger, Elbel der Landrichter, Ott der Haholspecher, Chunrat der Lempel, Tanqnart der Lempel, Ott der zeller, Chunrat der Rigler, Ott der Marschalch vnd ander pider leut gnuch, den diseu sach wol chunt ist. Der Brief ist geben von Christes gepurt dreuzehen hvndert Jar, dar nach in dem dreu vnd Treisigesten Jar an sand Gilgin tag.

Source Fulltext: OÖUB 6 (Wien 1972) S. 101f., Nr. 91