NOs ludolfus diuina miseracione decanus Chremensis ad vniuersorum noticiam cupimus tenore presencium peruenire, Quod, cum ex conmissione Reuerendi in christo patris et domini nostri domini Alberti Pataviensis Episcopi nobis facta, Ad instanciam venerabilis viri domini wisenthonis Prepositi et Conuentus Monasterij in waldhausen Ordinis sancti Augustini Canonicorum Regularium Discretum dominum wulfingum Plebanum Ecclesie de Steutz dicte Pataviensis dyocesis super collectione quarundam decimarum in villa Entzeinstorf et Chaudendorf ad nostram scitassemus presenciam, Tandem partes eedem saniori ducte consilio super conmissione prefata conposicionem nierunt infrascriptam, videlicet quod ipse Prepositus dicti Monasterii in walthausen abhinc in antea perpetuo in omnibus laneis dictarum villarum cultis et colendis mediam partem decimarum maiorum et minorum in campis et in villis et ipse Plebanus mediam partem possidebunt Exceptis curticulis et agris, qui wlgariter vberlenêkcher nuncupantur, qui ad ipsum plebanum specialiter pertinebunt; Sic tamen, quod si in futurum de predictis laneis aliqui venderentur agri aut in remedio darentur, quod nichilominus ad illum, ad quem in predictis laneis percepcio decimarum pertinebat, idem easdem decimas tollat in agris eisdem et percipiat in futurum. Concordatum est etiam, quod annis singulis in posterum nuncij siue decimatores aut currus tam ipsius domini Prepositi quam plebani in percepcione siue collectione decimarum maiorum et minorum in campis et in villis simul colligere debeant nec vnus sine altero facere debeat aliquam de prefatis decimis collectivam, Promittentes omnia et singula suprascripta rata tenere et inuiolabiliter obseruare sub penis infrascriptis, videlicet quod quecunque parcium predictarum premissa annis singulis in toto uel in parte non obseruaret, domino nostro Episcopo Pataviensi X libras, nobis, IIIIor, Decano Ecclesie in Steutz II. et parti obseruanti conposicionem IIIIor librarum denariorum wiennensium sine contradiccione qualibet soluere teneatur. Quara conposicionem auctoritate nobis tradita ratificamus et tenore presencium confirmamus. In quorum omnium testimonium presentes litteras fieri fecimus (et) nostro et dicti domini prepositi ac plebani sigillis conmuniri. Actum et datum Chremse Anno domini M°. CCC°. XXXIII°. jn die beate Lucie virginis presentibus honorabilibus viris Magistro Petro decretorum doctore, plebano in Albrechtzperg, Magistro Theodorico in Gereinstorf domino Gozzone plebano in Stranstorf, domino Preunrico Plebano de Patzmanstorf, domino Reinhero de Grazz et quam pluribus alijs fidedignis testibus ad hoc vocatis pariter et rogatis.

Source Fulltext: OÖUB 6 (Wien 1972) S. 110f., Nr. 101