Ich Seyfrit der Tucz Purger ze Nevnburch vnd ich Offmei sein hausvrowe Wir vergehen vnd tun chunt allen leuten den, die disen brief lesent oder horent lesen, die nv lebent vnd hernach Chunftich sint, Daz wir mit aller vnser erben guten willen vnd gunst, mit verdachtem mu^et vnd mit gesampter hant zv der zeit, do wir iz wol getun mochten, vnd mit vnsers Purcherren hant Wisencz von Ru^ekesdorf verchauft haben vnser hause, daz da leit auf dem graben, daz Eczwen der schenchen gewesen ist, da man alle iar von dient dem goczhaus ze Nevnburch an sand Gorigen tage zwainczich phenning ze gruntrecht vnd nicht mer. Daz vorgenant Haus haben wir Recht vnd redleichen verchauft vnd geben mit allem dem nu^ecz vnd recht, alz wir iz in Purchrechtes gewer herpracht haben, vmb fu^emf vnd fumczich phunt wienner phenning, der wir gar vnd gaenczleichen verricht vnd gewert sein, dem Erbern herren hern Wisenten Probst ze Walthausen vnd dem Conuent doselben furbaz in ledichleichen vnd vreyleichen ze haben vnd allen irn frvmen damit schaffen, verchauffen, verseczen vnd geben, swem si wellen, an allen irresal. Vnd darvber durch pezzer sicherhait, so seczen wir vns ich Seyfrit der Tucz vnd ich Offmei sein hausvrowe vnd vnser paid Erben vnuerschaidenleichen Vber das vorgenant haus dem Egenanten herren, hern Wisenten probst des goczhaus ze walthausen vnd dem Conuent doselben ze Rechtem gewer vnd scherm fu^er alle ansprach, alz purch.rechtes recht ist vnd des Landez recht ze Osterreich. Waer aber, daz si mit recht an demselben haus dehainen chrieg oder ansprach gewu^enen, waz si dez schaden nement, von welcher Lay dinge das sei, daz si bei irn trewen gesagen mu^egen, daz suln wir in allez richten vnd widerchern an alle ir mv^e vnd an allen irn schaden, Vnd suln auch si daz haben auf vns vnd auf allem vnserm gu^et, daz wir haben in dem lande ze Osterreich oder wo wir iz haben, ez sei Erbgu^et oder varnt gu^et, swie so daz genant ist, wir sein lebentich oder tode. Vnd daz diser chauf furbaz also staet vnd vnczerbroehen beleib, Darvmb so geben wir in disen brief ze Einem waren vrchunde vnd ze einer Ebigen Vestnvng diser sache versigilt mit vnserm jnsigel vnd mit vnsers vorgenanten Purchherren insigil Wisencz von Ru^ekesdorf vnd mit Gundolcz insigil meins Pruders, die diser sache gezeuge sint mit irn Insigiln. Der brief ist geben nach Christes gepurt drevczehen Hundert iar, darnach in dem zwai vnd Vierczigisten iar an sand Gorigen Tage.

Source Fulltext: OÖUB 6 (Wien 1972) S. 411f., Nr. 407