Ich Larencz von O^ed Landricher ze den selben zeitten in dem Machlande vergich offenbar vnd tuen chvnt alln Leuten, di den prief sechent oder ho^ernt lesen, di nv^en sind vnd hernach chvmftig werdent, Daz vor mich chommen ist in offner lantschran dacz Ruepreczhoffen des Gotzha^eus anwalt von Walthaussen vnd Leb in dem pirchech des vorgenantten Gotzhaus holde vnd auch ein auz geno^emner Tag dahin geben wart Freitlein dem Jungen von Winthag vnd Vlreichen vnd Symon sein holden paiden, daz si daz Recht gesu°echt schulten haben, daz in dahin geben wart paidenthalb vmb ain vbervanch ainer waide, daz si daz Egenant gotzhaus vnd den vorgenantten Leb vmb E hetten angesprochen vor dem vorgenantten Lantrichter, da cho^em Freitln noch sein anbalt nicht vnd gesuecht daz recht nicht, daz in dahin geben wazz wartten paidenthalb, da wart daz geding gefragt, do der Tailt Ritter vnd Chnet, seint daz Freitln vnd auch sein holden nicht ze dem recht cho^em, daz in dahin geben wart paidenthalb, So scholt daz vorgenant Gotzhaüs von Walthaussen vnd der vorgenant in dem pirchech Leb des gotzhaüs holde ledig sein mit rechtem recht vnd mit frag vnd mit v^ertail vmb den ansprach, da sev der Egenant Freitlen von winthag vnd der vorgenant Vlreich vnd Symon vmb E hetten angesprochen vor dem vorgenantten hern Larentzen. daz disev Red stet vnd vntzeprochen beleib, darüber gib ich dem vorgenantten Gotzhau°s von Walthaussen vnd dem Egenantten Leb des Gotzhaüs Holde vnd alln sein Erben, wie die genant sint, disen Prief versigelt mit meinem Anhangvnden jnsigel vnd ze ainem sichtig gezeug. Der Prief ist geben, do man zalt von Christes gepu°rde Dreitzehen Hv°ndert Jar, darnach in dem Fumf vnd Viertzigisten Jar des phintztag nach Sand Michels tag,

Source Fulltext: OÖUB 6 (Wien 1972) S. 527f., Nr. 522