Ich Chunrat von GokenReut Vnd ich Gerdraut sein Housfrow Vnd ich Ulrich ir paider sun Vnd ich Peters sein Hausfrow vnd alle vnser vierer Erben, wir verichen durch rechter ehafter not willen, di wir in offner schranne bestetigt haben, daz wir gesatzt haben dem Ersamen herren Probst Wisenten zden zeiten vnd der samnu^eng ze Walthausen ein gu^et, daz vnser freys aigen gewesen ist, vmb sechtzig phunt wienner phenning, der wir gantz vnd gar von in verricht vnd gewert sein ze rechten tegen. Vnd ist daz selb guet gelegen in sand Go^ergen pharre, dez auch zwai gueter sind, gehaizzen an der Eben pei hinderleiten vnd dar zu ein hofstat da pei genant im Rosental, daz emaln allez nu^er ain hof gewesen ist, Also beschaidenlich, daz di e genanten herren der Probst vnd di sammung vnd alle ir nach chomen daz e genant guet inne sullen haben vnd niezzen so lang, vnz wir oder vnser Erben den egenannten herren von Walthausen oder irn nach chomen di selben sechtzig phunt phenning wider chern vnd geben. Wir sullen auch vnd alle vnser Erben den oft genanten herren von Walthausen vnd irn nach chomen den selbe satz scher-men vnd frein fur alle ansprach, als landes recht ist. Wann auch, daz wir oder vnser Erben den oft genanten herren dem Probst oder der sammung oder irn nach chomen die egenanten sechtzig phunt phenning wider cherten vnd seu der zder Liecht misse in viertzehen tag vor oder viertzehen tagen hin nach gentzlich berichten vnd gewerten, so sullen wir vns dez oft genanten guets vnder winden an allen chrieg vnd haben mit allen dem recht als iz emaln vnser freis aigen gewesen ist. Vnd sullen auch die egenanten herren von Walthausen noch ir nach chomen dehain ansprach dar auf nicht mer haben. Wann aber sich di selben vier wochen vergingen also, daz daz vor genant guet von vns vnd von vnsern erben vngelost belib, als vor verschriben ist, so sullen die vor genanten herren von Walthausen aber daz selb guet als ander ir guet nutzen vnd niezzen aber daz iar chunftichlichen. Vnd daz auch di red also von vns allen stet vnd vnuerchert beleib, so geben wir den oft genanten herren dem Probst vnd dem Conuent zu Walthausen vnd allen irn nach chomen den prief versigelt mit des erbern herren hern Jansen von Chappelle anhangunden insigel, der durch vnser sunder gepet willen den prief versigelt hat. Wand wir selben dehain aigens insigel nie gewunnen. Vnd auch mit der erbern Ritter paider hern Wetzleins von Erbing vnd hern Larentzen von O^ed anhangunden insigeln, di auch der sach getzeug sind mit sampt andern erbern leuten gnu^eg, di da pei gewesen sind. Der prief ist geben nach Christi gepurd vber dreutzehen hundert jar, dar nach in dem siben vnd viertzkisten iar cze der liecht misse.

Source Fulltext: OÖUB 7 (Wien 1876) S. 5f., Nr. 5