Ich Alhait Fridreichs des Tanna^er witibe, dem Got genad, vnd ich Vlreich ir su^en vnd mit vns alle vnser erben, ez sein sun oder tochter, wie di genant sind, vnd ich Tanquard der Chlammêr vnd ich Mertt sein sv^on vnd mit vns all vnser erben, wir vergechen vnd tuen chund allen den, di den prief sehent oder horent lesen, daz wir mit wol bedachtem muet vnd mit guetleichem willen vnser vnd aller vnserr erben vnd auch mit gesampter hant vnd nach vnserr pesten vreůnt rat ze den zeiten, do wier daz wol mit recht getuen mochten, vnuerschaidenleichen, recht vnd redleichen ze chauffen haben gegeben (versetzt haben) ein hueb, die genant ist datz des Tanna^er lehen datz dem Chuertzen auf dem Okrain, di gelegen ist in Mu^enizpekher pharre vnd vnser vreyez aygen (gewesen) ist, dem erbêrn herren probst jansen datz Walthausen vnd allen seinen nachchomen vnd dem conuent vnd auch dem gotshaus da selben mit allen den rechten vnd nutzen, als wir sei selber vnd vnser vodern vnuersprochenleich in rechtes aygens gewer inn haben gehabt, ez sei versuecht oder vnuersuecht, gestift oder vngestift, mit holcz, mit velden, mit wismaden, wie daz genant ist, vmb zway vnd dreizzig phunt phenning wiennêr můnczze, der wir von in gantz vnd gar gericht vnd gewert sein an allen vnsern schaden also mit auz genomener red, daz wier der vorgenanten hueb, der aygenschaft vnd des chauffes (satzes) ir gewern vnd scherrm schullen sein an allez geva^er nach landes recht in Osterreich. Wir offenn auch mer an dem prief, daz wir von all vnser erben vns des vorgeschribenn guetes ebichleich ze vertzicht getan haben in offner lantschrann vor dem lantrichter vnd vor erbêrn rittern vnd chnechten zden zeiten, do wir ez wol getuen mochten, daz wir noch vnser erben dhain ansprach noch dhain recht immermer dar an haben schullen an dhainer stat, daz loben wir in mit vnsern triwen sta^et zebehalten an allez gevêr. Vnd daz dem vorgenanten erbern herren probst Jansen vnd seinen nachchomen vnd dem conuent vnd auch dem gotshaus datz Walthausen di red vnd daz gelůb also stêt vnd vntzebrochen beleib von vns allen, di vorgenant sind, vnd auch von allen vnsern erben, dar vber gib ich vorgenanter Tanquard der Chlammer den prief versigelten mit meinem anhangunden jnsigel, dar zue haben wir gepeten den ersamen ritter hern Weczel von Erbing vnd Otten den O^eder ze den zeiten lantrichter im Machland vnd Dietreichen den Tannêr, daz iederman mit sampt seinem anhangundem jnsigel der red vnd des chauffes (satzes) geczeug ist, wand wier ich vorgenante Alhait vnd Vlreich ir sůn vnd vnser erben vnd Mertt Danquarts des Chlammer sun des mit vnsern treuwen. vergechen, daz wir zden zeiten nicht aygener jnsigel haben gehabt. Der prief ist gegeben, do man zalt von Christes gepuerd dreuczehen hundert jar, dar nach in dem aynz vnd fumfczigistem iar an vnser Vrouwen tag zder liechten messe.

Source Fulltext: OÖUB 7 (Wien 1876) S. 224ff., Nr. 222