Wir Albrecht von Gates gnaden hertzog ze Osterreich, ze Sieir vnd ze Kernnden t/eun kunt mit disem brief, das wir durch Got vnd durch vnnser vnnd vnsrer vordern vnd auch vnser nachkomen seeln hail willen vnd jn eren des gutn hern sandt Niklas mit der erbern vnd geistlichen lewt vnsers lieben capplan. Des brobst vnd des conuents zu Waldhawsenn gu^enst ain ewige messe jn jr kirchen ze Spitall ze hanndt nyderthalb des Strudms gestifft haben, di derselb brobst vnd der conuent mit ainem erbern briester jrs ordens bestifften vnd begeen sullen, vnd derselb sol haben ainen briester zu gesellen jm zu hilff, er sei geistlich jrs ordens oder welttich also, das die baid briester begeen die egenant ewige mess vnd auch stetigkleich daselbs sytzen. Si sulln auch kainer mess auf das haws zu Werbenstain gebunden sein. Wir haben jn auch zu derselben ewigen mess geben zwaihundert phunt wienner phenning, der si genntzlich verricht vnd gewert sind. Vnd dar vmb si verlehenndte gu^eter, die von vns lehen sein kauffen su^elln, derselben gu^eter aygentschafft wir dann auch zu derselben mess vnd zu dem gotshaws zu Waldhawsen geben mit disem brief; dartzu haben wir dem brobst vnd dem conuent zu Waldhawsen mit des erwirdigen bischoffs Gotfrides von passaw willen vnd gu^enst besta^ett alle jr nu^etze jrs allmusen vnd des sammens, das emaln von alter zu demselben gotshaws ze Spitall geho^ert hat vnd das jn vor mit gewallt enpfrembt was, oberthalb vnd nyderthalb des Strudms also, das nyemandt sammen sol auf der tu^enaw von aller schiffung auf noch ab zwischen Ardakher vnd Ybs, den allain zu dem egenanten gotshaws zu Spitall Si su^elln auch von demselben allmusen die weg pessern, die von alter dauon gepessert sind, die sich anheben dats Ho^enstain nyderthalb werbenstain vnd geent hin zetal gen Prenntlein an der wennt gegen Serbnich vber ainhalb der tu^enaw, dann annderthalb aufwertes von Serbnich für Spitall vnczt fu^er Werbenstain vber die klaus jn den pawngarten nyderthalb des dyessenpaches. Si su^elln auch zu dem, vnd die zech hat, das gotshaws beleuchten vnd pessern, was inwenndlicben dartzu gehort, vnd was dann des obgenanten allmusen vber dasselb alles vber wirt, da sol der pharrer ze Spitall vnd sein gesell jr phru^ent mit pessern. Wa^er aber, das sie die vorgenant ewige mess ze Spitall nit begiengen vnd bestifften mit aim erbern briestern jrs ordens vnd mit ainem gesellen, als vorgeschriben ist, so su^elln wir, vnser eriben vnd vnser nachkomen sew mannen mit ainer gewissen, vnd wa^ern si oder jr nachkomen dann sa^eumig vnd es nach der manung jn ainem monat nicht volligkleich wider prachten an grosse eehafft no^ett, so su^elln wir, vnser eriben oder vnser nachkomen dieselben messe levhen ainem anndern briester, wemm wir wellen, mit derselben gu^ellt, die wir zu derselben mess besta^ett vnd geben haben vnd mit den zwainhundert phunden wienner phenning, die wir jn auch darzu geben haben, dafur si vns geweist haben auf zwelffmutt korn gu^ellt vnd auf acht mutt habernn gu^ellt, der dient man von der newnstatt funff mutt korn vnd funf mutt habern, das annder getraid su^elln si richten aus Erbinger pharr von jrem zehenndt, den si da habent, vnd zway phunt gelts wienner phenning auf drein Guetern, die gelegen sind jn Waldhawser pharr, das erst zu Ritenstain, da man an sandt Jorigen tag ain phunt phenning von dient, das annder jm Stainnoch, da man an sandt Giligen tag ain halb phunt phenning von dient, das dritt ain lehen, dauon man auch an sandt Giligentag ain halb phunt phenning diennet. Wann aber der briester, dem dieselb mess mit derselben gu^ellt gelihen wurde, nit mer wa^er, so soll dieselb mess mit derselben gu^ellt aller gefallen an das gotshaws ze Waldhawsen mit allen den rechten, als vorgeschriben ist, vnd su^elln si auch den offtgenanten gotsdienst ga^enntzlich dann volfuern. Wa^er auch, das vnserer eriben oder vnserer nachkomen, burggrauen oder phleger zu Werbenstain oder annder jemand dem vorgenanten gotshaws zu Waldhawsen an der vorgenanten sammen des allmu^esen kainen gewallt oder jrrung tet, das su^elln si bringen an vns, an vnsr eriben oder vnser nachkomen oder pfleger mit ainem gewissen, so su^elln wir, vnser eriben oder vnser nachkomen oder pfleger jn dann dasselb vnuertzogentlich aufrichten. Des geben Wir zu vrkunt disen brief besiglt mit vnserm insigl, der geben ist zu Wienn an freytag nach sandt Scholasticen tag, da man zallt nach Cristj gebu^erd dreyzehenhundert jar, darnach in dem ainsundfunfftzigisten jar.

Source Fulltext: OÖUB 7 (Wien 1876) S. 229ff., Nr. 227