Wir Albrecht von Gottes gnaden hertzog ze Oesterreich, ze Steyer vnd ze Kernden tu^en chunt, das wir den erbern vnd geistlichen leuten, vnsern lieben chaplan, dem probst vnd ... dem conuent ze Walthusen darumb, das si den Gots dienst vnd die ewigen messe, di wir ze spital zehant niderhalb des Strudens Got ze lob vnd in eren sand Niclas, vns vnd vnsern vordern selen zehilf vnd ze tro^est gestift haben, dester baz volenden vnd volfueren mugen, geben vnd geschafft haben vnd geben vnd schaffen in ouch mit disem brief an vnser maut ze Lintz sechs phunt wienner phennig, di si alle ia^er ewechleich, wann si wellen, an saltze an derselben maut furfu^eren svllen vnd wellen, das in vnser Mauter ze Lintz, swer der ye in dem iar ist, chain irrung daran tu^ee in dehain weg, wan wir vnd vnser nachomen dieselben sechs phunt phenig demselben vnserm mautter verleichen an der mau^ett ze Lintz abslahen, mit vrchu^end ditz priefs. Geben ze Wienn an sand Vincency tag nach Christes gepurd dreutzehen hundert iar, darnach in dem ain vnd fu^emftzigsten iar.

Source Fulltext: OÖUB 7 (Wien 1876) S. 223, Nr. 220