Ich Wulfinch der Stainer vnd ich Offmey sein housfrow vnd mit sampt vns alle vnser erben, sün vnd töchter vnuerscheidenlich, veriehen vnd tün chunt mit dem gegenburtigen prief allen den, di in sehent lesent oder ho^erent lesen, di nu lebent oder hernach kunftig wernt, daz w^eir mit wol verainten mu^et vnd auch nach zeitigem rat vnserr pesten vreund aller, zder zeit do wir ez mit recht wol getun machten, recht vnd redlich gesatzt haben den ersamen geistlichen herren brobst Johansen vnd dem convent ze Waldhausen ein gu^et, daz vnser freys aigen gewesen ist, dez fumf güeter sind vnd gelegen alle in der pharre ze Dunnpach, als sie hie an dem brif benant sind, Zwai güter ze Ebersdorf, ains ze Gazzen, ains vor dem Panholtz vnd ains datz dem Stadel, gesatzt haben an phandes stat für achtzig phunt wienner phennig, der wir gantz vnd gar an allen vnsern schaden von in ze rechten tegen bericht vnd gewert sein also bescheidenlich, daz di egenanten herren ze Waldhausen vnd alle ir nachkomen die egenanten güeter inne haben sullen vnd niezzen, als ander ir aigen gu^et mit allen den nutzen vnd rechten, als si dar zu^e geho^ernt, als wi^er vnd vnser voruodern seu inne gehabt haben manich iar vnd tag, versucht oder vnuersucht, ze holtz ze veld ze wismat ze waid vnd ze wazzer, gestift oder vngestift, wie ez genant sei, so lang, vntz wir oder vnser erben den egenanten herren ze Waldhausen oder irn nachkomen di selben achtzig phunt phenning widerchern gentzlich vnd berichten. Wir sullen auch derselben vorgenanten güter ir gewer sein vnd ir scherme für alle ansprach, wo in dez durft geschicht als aigens recht ist in dem land ze Osterrich. Teten wir dez nicht, swi getanen schaden si dez nemen mit recht, den si bei irr bescheidenheit gesagen oder weisen möchten, den sullen wir in ab legen gentzlichen vnd sullen auch daz haben auf aller der hab, di wir haben in dem land ze Österrich, ez sei varund oder anlikgund gu^et, wa si dar auf körnen, wir sein lebendig oder to^ed. Wir haben auch lo^esens recht alle an vnserr Vrowen tag zder Lichtmisse virtzehen tag vor oder virtzehen tag hinnach, wanne wir seu danne der vorgenanten achtzig phunt phenning gentzlich berichten vnd wern in denselben vir wochen, so sind di obgenante gu^eter vns alleu wider ledig, vnd sullen auch vns der wider vndertzihen vnd di nutzen als ander vnser aigen gu^et, als wir ez auch emaln in aigenschaft her in rechter gewer bracht haben. Vnd sullen auch danne fürbaz di oft genanten herren ze Waldhausen hintz den oftgenanten gütern dehain ansprach haben vil noch wenich. Swelichs iares aber sich daz verget also, daz di vorgenanten güter in den ob geschriben vir wochen von vns oder von vnsern erben nicht gelöst würden, so sullen di vorgenanten herren ze Waldhausen oder ir nachkomen di egenanten güter inne haben vnd wider nützen, als ander ir aigen gu^et in aller der mazze, als vor verschriben ist, aber daz iar künftichlichen. Vnd daz in daz allez stet vnd vnzebrochen beleib, als vor verschriben ist, dar vber geben wir in den brif besigelt vnd bestett mit meins egenants Wulfings dez Stainer anhangunden insigel, vnd mit dez erbern ritter hern Chraften dez Hawser insigel. Vnd dar zu^e mit der erbern leut Wernhers von Walichsto^erf an seiner hausfrow^en stat, Jansen dez Stainer, Stephans vnd seins bru^eder Heinrich von Aw^e vnd Otten dez Imptzinger, aller anhangunden insigeln, di mit sampt andern erbern leuten gnu^eg der sach getzeug sind vnd durch vnserr gepet willen ir insigel zu einer ewigen sicherhait der obgeschriben sach gehangen habent an den gegenbürtigen brif, der geben ist nach Christi gepu^erd vber dreutzehen hundert iar, darnach in dem ains vnd fu^emftzigsten iar an sand Florians tag.

Source Fulltext: OÖUB 7 (Wien 1876) S. 245ff., Nr. 241