Wir Johannes von Gocz gnaden brobst vnd di sammung gemainchlich ze Waldhausen veriehen offenbar an dem brif, daz wir di töten, di in der Tünaw verderbent oder ander ellend töten, wo wir seu vinden oder darauf geweiset wern zwischen dem Struden vnd sand Kylians kirchen ze Sedmich hie dishalb der Tünaw, da landezhalb gelegen ist diselbe kirchen Sedmich, bestatten sullen nach christenlicher ordenung pei vnserr kirchen ainer daselbs ze Spital oder ze Sedmich darvmb, daz vns vnser gnediger herr der hochgeporn fürst herczog Albrecht ze Osterreich daz almüssen des sammens von der schiffung aufwerts durch den Struden hat bestêtt mit seinen priefen. Wer auch daz, daz der priester, wer pharrer wer zder vorgenanten kirchen ze Spital, daran säumich wêr, mit swelhem gut danne derselb eilend töt bestatt würt, dez der selb pharrer mit einer gewizzen beweiset wurd, daz sol er allez gêntzlich widerchern mit geleihem gut; têt er dez nicht, so sol der purkgraf oder wer di weil phleger ist ze Werbenstain, di nutz dez selben sammens zu sand Niclas hinz Spital aufwertz durch den Struden so lang innehaben, vntz di selbe saumung werd widerbracht also, daz daz selb gu^et, damit der tot wurd bestatt, gentzlich würd widerchert. vnd wanne auch daz gesch/aech, so sullen wir vns wider selben nutz dez sammens vnderczihen vnd di innehaben in aller der mazze, vnd wir seu emaln haben innegehabt. Wir sullen auch daz oftgenant almüsen dez sammens aufwerts durch den Strudem vnbedwungenchlich innemen also, daz nimant darzu bedwungen werd ze geben danne alain, der in andacht durch Got vnd in sand Nyclas ern sein hand darzu raichet. vnd dez verpinden wir vns ewichleichen mit gu^etlichem willen allez stêt ze behalten. Mit vrkund dez brifs, der besigelt ist mit vnsers vorgenanten brobst Jansen vnd auch der sammung ze Waldhausen paider anhangundem insigel. Datum Walthusen Viti martiris anno domini M°. CCC°. quinquagesimo primo.

Source Fulltext: OÖUB 7 (Wien 1876) S. 252f., Nr. 248