Nos Gotfridus dei gratia Patauiensis episcopus ad vniuersorum notitiam deducimus per presentes, quod cum inter venerabilem in Christo Johannem prepositum et conuentum monasterij Walthusensis ordinis sancti Augustini canonicorum regularium nostre dyocesis nomine parrochialis ecclesie sancti Thome eiusdem diocesis ad ipsos et monasterium ipsorum pertinentis ex vna et strenuum militem Purchardum dictum Chneuzzer ex parte altera super dotationem cappelle in castro Sa^echssenekk eiusdem ecclesie sancti Thome iam predicte constructe ac institutione perpetui cappellani ibidem fuisset aliquamdiu disceptatum, tamen inter eos tandem talis concordia interuenit quod prepositus et conuentus prefati suum ad hoc prestiterunt consensum, quod ipse habere debeat in predicta cappella vnum perpetuum cappellanum qui singulis diebus dum id a iure fuerit permissum missarum sollempnia hominibus dicti castri extraneos repellendo valeat celebrare, prout sacrorum tradunt canonum instituta, alias debite puniendus. Potest etiam idem capellanus pro hominibus eiusdem castri dumtaxat nedum salis et aque in diebus dominicis, sed et infrascriptis diebus et festis videlicet purificationis beate Marie candelarum, Blasij Martiris salis, in capite jejunii cinerum, in dominica in palmis palmarum et in die resurrectionis dominice carnium et ouorum et aliorum huiusmodi benedictionem facere sicut decet. Nullam tamen habere debet inibi sepulturam nec alicui de castro existenti prefato aliqua alia administrare presumat ecclesiastica sacramenta nisi ad hoc predicti prepositi vel saltem rectoris ecclesie sancti Thome memorate expressa voluntas accederet et consensus. Et ne eidem ecclesie sancti Thome sepedicte aliquod ex premissis preiudicium generetur, memoratus Purchadus eidem ecclesie fecit videlicet duarurn et dimidie librarum reddituum denariorum wiennensium congruam reconpensam. Dicti vero prepositus conuentus et Purchardus nobis cum instantia supplicarunt, vt premissam institutionem dotationem et reconpensarn auctoritate ordinaria ratificare approbare et confirmare ex officij nostri debito dignaremur. Nos igitur tante pietattis opus beniuolo prosequentes affectu institutionem dotationem et recompensam sicuti expressum est superius, ac omnia alia et singula supradicta, sicut prouide facta sunt rata habemus et grata ipsaque robur habere decernimus perpetue firmitatis. In quorum testimonium presentes sigilli nostri appensione fecimus conmunirj. Datum Wienne dominica qua cantatur oculi anno dominj millesimo trecentesimo quinquagesimo nono.

Source Fulltext: OÖUB 7 (Wien 1876) S. 633f., Nr. 620