Ich Purchart der Chneuzzer vnd all mein erben vergich vnd tun chund das ich gehabt hau zway lehen di gelegen sind dacz Heutal bei La vnd sind mein vreis aygen gewesen, di ich gechauft han von Ortolfen vnd Chunraten prüdem den Heutalern vnd dienent acht vnd vierczich metzen waitz vnd als vil habern vnd sechs schilling phening wienner münzz, vnd der gelt ist geacht fur vier phunt wienner phenning geltz, vnd di selben zway lehen han ich gegeben den erbern geistlichen herren dem probst vnd dem conuent ze Walthausen des ersten vmb drithalb phunt gelts darumb, das si mir vnd meinen erben erlaubt habent aynen ewigen capplan ze haben dacz Sechsenekk, di vbrigen tzwelf schilling geltz haben si mir vergolten mit beraiten phenning. Des gib ich jn den gegenburtigen brief versidelt mit meinem jnsidel vnd mit meinz vetern jnsidel Jansen vnd mit herren Wetzels insidel von Erbing. Der geben ist nach Christi purd dreutzehenhundert iar darnach in dem newn vnd funftzigisten iar an vnser frawn tag zu der chunndung.

Source Fulltext: OÖUB 7 (Wien 1876) S. 635f., Nr. 623