Ich Cunrat der Pernner vnd ich Anna sein hausfraw vnd ich Hainreich der Pernner sein vetter vnd ich Kathrei desselben Hainreich swester wir veriehen vnd tůn kunt, das wir verkaufft haben vnsers rechten aygen sechs phunt vnd ainunddreissig phenning wienner munss, gelegen auf den gutern als hernach an disen brief geschriben sta^et, vnd auf allem dem vnd zu denselben gu^etern geho^eret, des ersten zu Newndorff auf zwain behaussten lehen vnd auf ainer hofstat vierthalb phunt vnd newnunddreyssig phenning gellts, vnd auf ainer wisen daselben die da geho^ert jn Vlreich des Haugstorffer halbs lehen ain halb phunt gelltes, vnd von ainer o^ed auch daselben zu Newndorff funffzehen phenning geltes, datz Ernstorff auf ainem behawssten lehen ain halb phunt gellts vnd daselben auf vberlendt holtz weinga^erten vnd akhern funff schilling gellts an drey phenning, dats Pernnhofen auf ainem halben behawssten lehen sibentzig phenning vnd zehen metzen waitz geltes, die vorgenant sechs phunt vnd ainunddreyssig phennig wienner mu^enss gellts auff den vorgeschriben gu^etern haben wir recht vnd redlich verkauft vnd geben mit allen den nutzen vnd rechten als wir si jn aygens gewer herrbracht haben vmb ainsundsibentzigkh phunt wienner phenning, der wir gar vnd ga^enntzlich gewert sein, den erbern geistlichen herrn brobst Johannsen vnd dem conuent gemain des klosters zu Waldhawsen vnd allen jren nachko^emen. Vnd wann die egenant junckhfraw Katrey noch nicht vogtper ist, darumb so setzen wir vns ich Cunrat der Pernner jr vetter vnd ich Anna sein hausfraw vnd ich Hainreich der Pernner derselben junckfrawen Katrei brueder vnd alle vnser eriben vnuerschaidenlich fu^er vns vnd fur dieselben Katrei vber die vorgenanten sechs phunt vnd ainunddreyssig phenning wienner mu^enss gellts den egenanten erbern geistlichen herrn gemain des klosters zu Walthawsen vnd jren nachkomen zu rechten geweren vnd scherm fur alle ansprach, als aygens recht ist vnd des lanndes recht zu Osterreich. Wer aber daz si furbass mit recht an den genanten gullten vnd gvetern icht krieges oder ansprach gewu^ennen, von wem das wa^er, was si des schaden na^emen, das sulln si haben auf vns vnuerschaidenlich vnd auf allem vnserm gu^et das wir haben jn den lannden ze Osterreich ze Steir vnd ze Kernnden oder wo wir es haben wie so das genant ist wir sein lembtig oder tode. vnd das diser kauff furbass stet vnd vnzebrochen beleibh, daruber so geben wir ich Cunrat der Pernner vnd ich Anna sein hausfraw vnd jch Hainreich der Pernner sein vetter fu^er vns vnd fu^er die egenant junkhfrawen Kathrey vnd fu^er all vnser eriben den obgenant erbern geistlichen herrn gemain zu Waldhawsen vnd jren nachko^emen disen brif zu einem waren vrkunt vnd zu ainer ewigen vestnung diser sach versigeltn mit vnsern insigln vnd mit herrn Perchtolds jnsigl von Pergaw zu den zeitn hoffrichter in Osterreich vnd mit herrn Jannsen jnsigl des Dursn von Rauchennekhe vnd mit herrn Jannsn jnsigl des Radebru^enner, die dits kauffs vnd diser sach gezewg sind mit jren jnsigln. der brief ist geben ze Wienn dreyzehenhundert iar darnach in dem sechzigistem iar des nachsten freytags vor sand Margarethen tag.

Source Fulltext: OÖUB 7 (Wien 1876) S. 703f., Nr. 700