Ich Perchtolt von Pergawe hofrichter in O^esterreich vergich, daz fu^er mich cham in daz hoftaiding do ich saz an einem rechten der erbirtig herre bropst Johans von Walthausen vnd chlagt mit varsprechen hintz Jansen dem Hagwalder, daz er in an sechs eins halben phunt wienner phenninge gelts entwert biet mit gwalt, des er engolten hiet vmb viertzig phunt wienner phenning vnd chlagt daz so lang hintz im, vntzen er im vro^ent seinen ho^ef ze Chlengrueb vnd die widern doselbs vnd ain holtz dobei daz nam Jans der Hagwalder aus der vro^en als er ze recht solt. Darnach in dem nasten hoftaiding cham der obgenant brobst fu^er recht vnd pat vragen was nun recht wêr. Do ertailten die lantherren vnd geuiel im auch mit vrag vnd mit v^ortail, seid der egenant Jans der Hagwalder noch sein anwalt noch niempt von seinen wegen nicht enantwvrt wer vnd die obgenanten gu^et nach der vrön nicht verantwvrt hiet alz er ze recht solt, man solt den obgenanten probst Johansen der vargeschriben güter gewaltig machen vnd an di gewer settzen innezehaben vnd allen seinen frumen domit ze schaffen so lang, vntzen er der vargenanten viertzig phunt phenninge gar vnd gantzlich dovon verricht vnd gewert werd, vnd sol in auch mein herre der hertzog darauf schirm, oder wer an seiner stat gewalt hat in dem land ze Osterreich.. Mit vrchünd des briefs, geben ze Wienn an eritag nach reminiscere anno domini M°.ccc°.LX°.

Source Fulltext: OÖUB 7 (Wien 1876) S. 686f., Nr. 678