Ich Vlreich der Pachanderz vnd ich Jevt sein hausvrawe ich Go^erg von Czimerperg vnd ich Elzpêt sein hausvraw^e ich Sighart von Czimerperg vnd ich Alhait Gorgeins vnd Sighartz swester vnd mit vns all vnser erben wier veriehen vnd tu^en chund offenleich, daz wier ze chauffen haben geben Jansen dem Chatzen ze Werfenstain vnd Agnesen seiner hausvrawen vnd allen irn paiden erben vnsers freyn aygen vnd ledigen vnd vnuerchumerten gu^et den hof halben datz Alhartzperg mit alle vnd darzu geho^ert, vmb sibentzehen phunt wienner phenning der wier gantz vnd gar verrichtt vnd gwert sein an allen schaden also, daz er vnd sein hausvrawe vnd all ier paider erben allen iren frum damit schullen schaffen wie sew wellent. Wier offen auch, daz wier vns dez verpunten haben mit vnsern trewen, daz wier noch all vnser erben hintz dem gantzen hof datz Alhartzperg, der gelegen ist in Sagsner pharr, den sew halben von vns chaufft habent alz oben an dem prief geschriben stet, vnd der vor halber ier ist gwesen, fu^erbaz chain ansprach noch dhain recht ewikleich schullen haben. Daz die red staet vnd vntzebrochen beleib, dez geben wier jn ze v^erchund den offen prief versigelten mit mein oben genanten Vlreichs dez Pachanderz anhangvnden jnsigel, vnd seind daz ich vorgenanter Go^erg vnd ich eegenanter Sighart nich aygen insigel haben, so verpint wier vns mit vnsern trewen allez daz staet ze haben daz oben an dem prief geschriben ist vnder der erbern herren insigel hern Jansen von Traw^en haupman datz der Vreynstat vnd Chunratz von Awe zden czeiten lantrichter in dem Machlant vnd Chunratz die weil richtet ze Grein, die wier darvmb gepeten haben, daz sew der sach getzeugen sein mit iern anhangvnden insigel in an schaden. Der prief ist geben dez suntags vor sand Thomans tag do man czalt von Christes gepu^erd dreutzehen hundert iar vnd in dem sechtzkistem iar.

Source Fulltext: OÖUB 7 (Wien 1876) S. 731f., Nr. 729