Ich Heinreich der Vrey und ich Dorothea sein hausvrow^e und ich Jacob der Vrey und ich Dyemut sein hansvrow und mit uns all unser erben sun und to^echter ... wir verjenen, ... . daz wir ... . ze chauffen haben geben den erbern geistlichen heren brobst Friedreichen cze den czeiten und dem convent ze Walthausen und iren nachchomen allen ain gu^et di zway tail da di vorgenanten herren e daz trittail an gehabt habent an allen nuczen, daz unser vreys aygen ist gewesen und leit in Walthauserpharr und haizzet auf dem Aigen und dyent ain halbs phunt phenning da unz di achtzig sind von gevallen und dem vorgenanten hern di vierczig, umb czehen phunt phenning wyenner mu^enzze der wier gancz und gar gericht und gewert sein ze rechten ta^egen an allen unserm schaden. Wier haben in auch daz selb gut gegeben ledichleich und unverchumert mit allen den gulten und nuczzen und rechten alz si darczu gehorent ... und auch mit allen den nuczen und davon cho^emen mugen in allen den rechten alz wir und unser erben ez manich jar und tag inngehabt haben und in rechter aygenschaft her haben pracht. Wir schullen auch dez vorgenanten gutz ier gewer und scherm sein fur all ansprach ... . Daz in daz allez sta^et und unczebrochen peleib als vor geschriben ist, daruber geb wier in den gegenburtigen prief versigelt und pestet mit unser paider anhangunden insigel, und mit dez erbern ritters hern Andres dez Hauser anhangunden insigel. Der prief ist geben do man zalt von Christi gepu^erd dreuczehen hundert jar darnach in dem vier und sechtzigistem jar nach sand Margreten tag dez nachsten suntag.

Source Fulltext: OÖUB 8 (Wien 1883) S. 182, Nr. 178