Ich Perchtolt von Pergaw hofrichter in Osterreich vergich offennlich mit dem. brieff, das fur mich kam do ich sass an dem rechten in dem hoftaiding ze Wienn, herr Jorig pharrer von Waldhawsen an brobst Fridrichst stat von Waldhawsen und klagt mit vorsprechen hyntz herr Hainreich von Hakkennberg umb ain traidzehenndt zu Pawngartn den er im gewert hiet ab dem veld zefu^eern mit gewahlt des er umb sechtzig phunt wienner phenning entgolten hiet, und klagt das als lanng hintz im nutz das im pitzaig darumb erthailt ward, und darnach in dem nachsten hoftaiding kam der vorgenant herr Jorig pharrer von Waldhawsen an seins gotshaws stat aber fu^er recht und patt fragen nach der pitzaig die er getan het was nu recht wa^er; da ertailten die lanndthern und geviel auch im do mit frag und mit urtail: seit der vorgenant herr Hainreich von Hakkenberg noch sein anwaldt noch yemand annder von sein wegen vor recht wa^er der die vorgenanten pitzaig vor recht verantwurt hiet als er zu recht solt, so solt auch man den vorgenanten herrn Jorigen pharrer von Waldhawsen an seins gotshaws stat seiner hab als vil gewaltig machen und an die gewer setzen, so wo er darauf komen oder zaigen mo^echt es wa^er eribgut oder varund gut, und solt auch das dann innehaben nyessen und nutzen und allen seinen frummen damit schaffen, als und unczt er der vorgenant sechtzigk phunt wienner phenning gantz und gantz (sic) verricht und gewert werd. So sol auch in mein herr der hertzog oder so wer an seiner stat gewallt hat im lanndt zu Osterreich darauf schirm und frein vor allem gewallt und unrecht. Mit urkundt des brief versiglt mit meinem anhangunden insigl, der geben ist zu Wienn nach Cristi geburd dreuzehenhundert jar darnach in dem zwayundsibentzigistem jar des mittichen vor gotsleichnamstag.

Source Fulltext: OÖUB 8 (Wien 1883) S. 592f., Nr. 590