Wier Fridreich von Gotes gnaden probst cze Walthawsen ich Stephan der techant und der convent gemainchleich daselbs verjehen, daz wier den erbern Dietmarn dem Weczel und Ulreichen dem Weczel seinem pru^eder und allen iern erben die gu^et und die beschaidenhait haben getan an dem hof, den sie von uns und u^enserm vorgenanten gotshaus habent cze rechtem pu^erchrecht und ist genant der Widemhof und gelegen cze Erbing in dem do^erf mit alle die und darczu^e geho^ert, von dem sie u^ens von alter her all jar ja^erleich hahent gedient drew phunt phenning in u^enser gwant chamer czu u^ensern vilczschu^echen, also beschaidenleich, daz sie fu^erbaz und ier erben mit dem selben hof schu^ellen allen iern frum schaffen mit verseczen mit verchauffen und geben swem sie wellen, in den rechten und sie von u^ens habent, und schu^ellen fu^erbaz nimmer mer alle jar ja^erleich von dem selben hof u^ens raichen und dienen unserm chamrer in unser gwantchamer czu u^ensern vilczschu^echen cze rechtem pu^erchrecht czway phunt wiennnr phenning, ain phunt an sand Michels tag und ain phunt an sand Cholmans tag, ez sey der selb hof cze veld oder cze do^erf gestift oder nicht gestift. Und wenn daz ist daz sie oder ier erben den vorgenanten hof wellent verseczen oder verchauffen, daz schu^ellen si tu^en mit unsers amptmans hant der cze der selben czeit chamrer ist unsers gwants, und schu^ellen dem davon geben drey phenning cze anlait und drey cze ablait. Waer aber daz daz sie oder ier erben ier nachcho^emen oder ier gaben (sic) daz vorgenant pu^erchrecht die czway phunt phenning u^ens alle jar ja^erleich nicht raichten und dienten cze den ta^egen als vor geschriben stet, so get wandel darauf als pu^erchrechts recht ist in dem lant cze O^esterreich, Und daz die red und handlung fu^erbaz also sta^et und unczebrochen beleib, daruber geb wier vorgenanter probst Fridreich und der convent gemainchleich cze Walthawsen den obgenanten paiden pru^edern Dietmarn und Ulreich den Weczeln den prief versigelten mit unserm und unsers convents anhangunden insigeln. Der prief ist geben do man czalt von Christi drewczehenhundert jar darnach in dem fu^emf und sibenczgisten jar an sand Ru^epprechts tag in der vasten.

Source Fulltext: OÖUB 8 (Wien 1883) S. 751f., Nr. 729