Ich Eberhart von Kappellen vergich für mich vnd all mein erben vnd tun kundt offenlich mit dem brief allen den, dy den brief sehent lesent oder hornt lesen, das ich durch liebnuzz vnd mein selhail willen gegeben hab vnd gib auch wissentlich mit dem brief dem erwirdigen geystlichen herrn brobst Hainrichen brobst ze Walthawsn vnd dem conuent daselbs die manschafft vnd aygenschafft, dy ich vnd mein voruordern gehabt haben auf den guetern, dy hernach geschriben stent: von erst auf dem hof genannt der Stainpeckenhof, item ein mul genant vor dem Tannech, item ein mul im Dunnpach, item ein hofstat genant dy Froschaw, item ein gut genannt der Chagram, item ein guet genant der Eysenperig, item ein guet genannt der Ferlhof vnd ain hofstat dapey, item zwaitail zehennd auf funnff guetern, von erst auf ainem hof genannt der Gusterhof, auf dem Ferlhof, auf der hofstat dapey, auf dem Eysenperig vnd auf dem Chagram vnd ein guet genannt datz der Wiz, das alles gelegen ist in Walthawser pharr. Wir haben in auch geben dy manschafft vnd aygenschafft auf den vorgenanntn guetern vnd zehennten mit allen den ern rechten vnd nutzen vnd mit aller irr zugehörung nichts darinn ausgenomen, als ich vnd mein voruodern von allter darauf gehabt haben, vnd gib in auch dy mit dem brief also, das ich noch mein erben und nachkomen hintz der eegenanten manschaft vnd aygenschafft vnd rechtn so wir auf den eegenanten guetern vnd stucken gehabt haben, hinfur ewigklich chain vordrung noch zuspruch nymmermer haben noch gewinnen sullen noch wellen, weder mit recht noch an recht in dhainerlay weis. Sy mugen auch allen irn frummen geschaffen mit der obgenanntn manschafft vnd aigenschaft auf den vorgenanten guetern vnd stucken, als mit annderm irm aigen gut an all vnnser vnnserer erben vnd nachkomen irrung vnd widerred. Vnd des zu vrkundt gib ich obgenanter Eberhart von Kapellen in den brief versigeltn mit meinem anhangundem innsigl vnd zu ainer getzewgnus mit meiner diener Nikla des Pawngartner dytzeit lanndtricliter niderhalb der Enns anhanngundem innsigel, im vnd seinen erben an schaden. Der brief ist geben, da man zalt von Kristi geburd tawsent jar drewhundert jar darnach in dem newnvndnewntzigisten jar an Mittichen in der Quottember in der Vassten.

Source Fulltext: OÖUB 11 (Wien 1983) S. 788-789