Bonifacius episcopus seruus seruorum Dei. Ad perpetuam rei memoriam. Sincere deuocionis affectus, quem dilecti filii prepositus et conventus monasterii in Waldhausen per prepositum soliti gubernari ordinis sancti Augustini Patauiensis diocesis ad nos et Romanam gerunt ecclesiam, promeretur, ut votis eorum, presertim que eorum ac dicti monasterii comodum et utilitatem conspiciunt, quantum cum Deo possumus, fauorabiliter annuamus. Hinc est, quod nos prepositi et conuentus predictorum in hac parte supplicacionibus inclinati in Chunigswisen et in Chreuczen ac in Sachsen dicte dyocesis parrochiates ecclesias, que de iure patronatus dicti monasterii existunt et quarum omnium viginti sex, cum omnibus iuribus et pertinentiis suis prefato monasterio, cuius centum marcharum argenti puri fructus redditus et proventus secundum communem extimacionem valorem annuum, ut asseritur, non excedunt, in releuamen onerum ipsis preposito et conventui ac monasterio pro tempore incumbencium, auctoritate apostolica imperpetuum vnimus annectimus et incorporamus, ita quod simul uel successiue cedentibus uel decedentibus dilectis filiis ipsarum ecclesiarum rectoribus, qui nunc sunt, uel ipsas ecclesias alias quomodolibet dimittentibus liceat prefatis preposito et conventui corporalem earundem possessionem auctoritate propria libere apprehendere ac perpetuo licite retinere illasque per ydoneos canonicos dicti monasterii ad nutum prepositi eiusdem monasterii pro tempore existentis ponendos et amouendos ac ad claustrum ipsius monasterii reuocandos, qui parrochianorum earundem ecclesiarum curam gerant et domino inibi deseruiant laudabiliter in diuinis, regi facere omnesque fructus redditus et prouentus huiusmodi earundem ecclesiarum in vsus proprios ac supportacionem onerum predictorum conmuniter et eciam deputare dyocesani loci et cuiuslibet alterius licencia super hoc minime requisita, itaque quod diuinus cultus in eisdem ecclesiis propterea non minuatur et quod in ecclesiis ipsis in diuinis obsequiis laudabiliter deseruiatur et animarum cura huiusmodi diligenter inibi exerceatur, quod idem prepositus et conventus episcopalia iura soluere et alia ipsarum ecclesiarum onera consueta in omnibus teneantur supportare, non obstantibus constitutionibus apostolicis et aliis contrariis quibuscumque, seu si aliqui super prouisionibus sibi faciendis de huiusmodi parrochialibus ecclesiis uel aliis beneficiis ecclesiasticis in illis partibus speciales uel generales apostolice sedis uel legatorum eius literas impetrarint^a), eciam si per eas ad inhibicionem reseruacionem et decretum uel alias quomodolibet sit processum, quas quidem literas et processus habitos et habendos per eosdem et quecunque inde secuta ad predictas ecclesias uolumus non extendi sed nullum per hoc eis quoad assecucionem beneficiorum aliorum preiudicium generari, et quibuslibet priuilegiis indulgenciis et literis apostolicis generalibus uel specialibus, quorumcumque tenorum existant, per que presentibus non expressa uel totaliter non inserta effectus earum impediri valeat quomodolibet uel differri et de quibus quorumque totis tenoribus habenda esset in nostris literis mencio specialis. Nos enim ex nunc irritum decreuimus et inane, si secus super hiis a quoquam quauis auctoritate scienter uel ignoranter contigerit attemptari. Nulli ergo omnino hominum liceat^b) hanc paginam nostre incorporacionis annexionis in nouis constitucionibus et voluntatis infringere uel ei ausu temerario contraire. Si quis hoc attemptare presumpserit indignacionem omnipotentis Dei et beatorum Petri et Pauli apostolorum eius se nouerit incursurum. Datum Rome aput sanctum Petrum VI. Kal. Februarii pontificatus nostri anno decimo.

Source Fulltext: OÖUB 11 (Wien 1983) S. 781-783