Wir Gotfrid von gotes gnaden tumprobst ze Pazzau verjehen und tuen chunt allen den, di disen brief an sehent oder hörent lesen, daz fur uns bracht ist und wir lesen gehört haben ein hantvest, da an verschriben stet, daz pischof Wernhart dem got gnad, daz Judenhaus ze Passau, daz die Judenschul genant ist, verschafet hat nach seinen tod gein Engelhartes Celle hinz dem chloster mit so getaner beschaidenheit, daz man denselben chloster dienen schol alle jar von dem vorgenanten haus sechs phund phening Pazzauer münzz, als man ze recht und gewönlich purchrecht von andern aigen dienet Das diz war und stet sei, dar über geben wir disen brief ze ainen gezeug dez genanten gescheftes mit unsern insigel. Der brief ist gegeben ze Pazzau nach Christes gepurd über dreuzehenhundert iar darnach in den vierzehenten iar an sant Margareten abent.

Source Fulltext: OÖUB 6 (Wien 1872), Nr. 58 (Anhang), S. 618