Joannes (XXII.) episcopus servus servorum dei dilectis filiis abbati et conventui monasterii beatae Mariae in Cella angelorum ordinis cisterciensis Pataviensis diocesis salutem et apostolicam benedictionem. Cum a nobis petitur, quod justam est et honestum, tam vigor equitatis quam ordo exigit rationis, ut id per solicitudinem officii nostri ad debitum perducatur effectum. Eapropter dilecti in domino filii vestris justis postulationibus grato concurrentes assensu personas vestras et monasterium vestrum beate Marie predictum, in quo divino estis obsequio mancipati, cum omnibus bonis, que in presentiarum rationabiliter possidetis aut in futurum justis modis prestante domino poteritis adipisci, sub beati Petri protectione suscipimus atque nostra omnesque libertates et immunitates a predecessoribus nostris Romanis pontificibus sive per privilegia vel alias indulgentias vobis et eidem monasterio concessas nec non libertates et exemptiones secularium exactionum a regibus, principibus et aliis Christi fidelibus rationabiliter vobis et monasterio vestro indultas, sicut ea juste et pacifice possidetis, vobis et per vos eidem vestro monasterio authoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre susceptionis confirmationis et communitionis infringere vel ei ausu temerario contraire. Si quis autem hoc attentare presumpserit, indignationem omnipotentis dei et beatorum Petri et Pauli apostolorum ejus se noverit incursurum. Datum Bononioe (Avenione?)XI. Kalendas Aprilis pontificatus nostri anno primo.

Source Fulltext: OÖUB 6 (Wien 1872), Nr. 61 (Anhang), S. 620