Ich Wernhard von Inn vergich und tuen chunt an disen meinen brief allen den, di in sehent oder hörent lesen, di nu lebent und her nach chunftig sint, daz ich mit sampt meinen gerben und auch mit guetem willen aller der, di dez recht heten oder haben wollen, verchauft han zwai guet und ain mül, die da gelegen sint in der Chesla, daz da haizt das mulpach, mit allen dem recht, daz dazu gehört versucht und unversucht, ze holz und ze veld, daz da mein lehen gewesen ist von dem pistum ze Pazzau dem erbern hern apt Friderichen und seiner samnung daz Engelcell umb. zwai und vierzig phunt Pazzauer phening, der ich recht und redleich gewert pin, mit solcher beschaidenhait, ob ein pischof von Pazzau di vorgenanten gut selb haben wolt, so schol der vorgenant apt und sein samnung ze Engelcell dem vorgenanten pischof untergeben di vorgenanten guet um di phening, da diselben gewer und gechauft sint. Iz ist auch dise gewerschaft geschechen mit guetem willen der erbern hern hern Meingot von gotes gnaden tumbrobst, Menigot dez dechantz und überal dez capitels ze Pazzau, di der selben zeit vollen gewalt heten der vorgenanten gewerschaft, und daz (das) stet und unzebrochen beleib, dez gib ich disen brief versigelt mit meinen insigl mit samt den zeugen, di hernach geschriben sint. Her Albrecht von Morspach, her Weichart von Storchenberch, maister Jans, her Weichart der schenk chorhern ze Pazzau, Seifrid der Stattrichter, Chunrat der mauter, der Weichman purger ze Pazzau, bruder Hainrich der prior, bruder Wernhart der chelner ze Engelcell. Diser brief ist gegeben ze Pazzau, do von Christes gepurd warden vergangen tausent iar dreuhundert iar darnach in den neunzehenten iar an sant Afferntag (Afra).

Source Fulltext: OÖUB 6 (Wien 1872), Nr. 63 (Anhang), S. 622