Ich Hadmar von Waldekk vergich offenbar an disem brief und tuen chunt allen den, di in an sehent oder hörent lesen, daz ich mit verdachten rnuet und mit rechtem fürsatze, do ich mich dannoh wol vermocht (sic) mit rat meiner hausfrauen vron Elspeten und ander meiner vreund guetleichen willen und verhanchnuz geben han unser frauen und den geistlichen hern ze Engelzell durch hail und durch selt meiner sel mir und meiner hausvrauen und allen meinen vordern zu einen ewigen selgret daz guet, daz da haizzet Stegpach .und ist in Engelhartsceller pharr gelegen mit allen dev und dar zu gehört, iz sei ze holz oder ze veld versucht und unversucht das Wolflein den Lautbrunner ze seinen tail von seinen vater ist besundleich an gevallen und daz ich recht und redlich von im gechauft han um berait pfening, der er genzlich gericht wart mit so getaner beschaidenhait, daz di vorgenanten hern daz selb guet schullen inne haben vreilich an allen irsal, pawen, niezzen, nuzen ewichleich und allen iren frum damit schaffen, alz si dez geniezzen wellent und doch also, daz si alle iar, di weil ich leb, da von meinen iartag schullen begen des nächsten tages nach sant Katreintage mit vigdig und mit messe nach irs ordens gewonhait und an den selben tag dem convent in den reuent do von dienen und geben vische, gueten wein und weiz brot daz der convent alle iar an den ebenanten tag getröst wirt, und wan ich au (sic) nicht, daz mich got lang über hef, an swelligen tag ich dann stürb, daran schullen si denselben iartag begen in all der mainung, als oben verschriben ist. Daz daz also stet und unzebrochen beleib ewigleieh dar über gib ich den oftgenanten hern und dem gotshaus ze Engelcell mit des vorgenanten Wolfleins und seines bruder Ortolfs und Hoedleins und ander seiner vreund guetleichen willen und gunst disen brief zu einer bestetigung diser sache mit meinen und mit hern Heinreichs von Valchenstain insigeln gesigelten. Und ist geschehen, do von Christes gepurd warn tausent iar dreuhundert iar darnach in den ains und zwaintzigsten iar an sant Peters und sant Paulstage der heiligen zwelif boten.

Source Fulltext: OÖUB 6 (Wien 1872), Nr. 64 (Anhang), S. 623