Ich Heinrich von Walsse haubtmann ze Ens vergich und urkunde mit disem brief allen den, die in sehent oder hörent lesen, daz ich Herzogs Rudolfs hantvest und die meinen, die di ersamen hern bruder Friedrich apt ze Engelcelle und die samung daselbs gehabt habent über die bestetigung des hofes ze Medling genant bey Seisenech gelegen, den ich von in gechouft han, in genomen han von den vorgenanten hern also beschaidentlich, wanne in des not und durft beschieht, daz ich dieselben hantvest vorbringen und zaigen sol mir ze scherm und ze churen von in mit der mainung der vorgenanten hantvest. (sic.) Und gib in darüber ze urkund disen brief mit meinen anhangenden insigel bestetet und gevestent. Der brief ist geben, do von Christus geburt warn dreuzehen hundert iar in den zwai und zwainzigisten iar an sant Sebastians tag.

Source Fulltext: OÖUB 6 (Wien 1872), Nr. 66 (Anhang), S. 624f.