Wir graf Bernhard von Schaunberg verjehen offenbar an disen prief und tuen chunt allen den, di in sehent oder ho^erent lesen, daz unser diener Cunrat der Rittperger und sein sun Burchart di erbern geistlichen hern apt Pilgrin und die samung ze Engelcell umtriben und ansprachen um den hof ze Traunolting also lang, bis daz ich denselben hern darum zu antworten fu°rboten war in daz landta^etting gen Linz, dieselbe sach cham fu^er uns und wurden des geweist und verstunden uns auch desselben wol, daz der vorgenant Rittperger und sein sun deselben nicht recht heten, und denen vorgenanten hern gewalt daran teten. da wir dessen gewar wurden darum, daz dieselben hern fu^erpas ungemuet bliben, namen wir dieselbe sach vor ir beider wegen u^eber uns. und in unser gnad. mit ir baider willen und verha^enknus, und war dieselbe sache mit Hern Alberts von Partshaim und hern Bernharts des Gneissen, ze den Zeiten Purchgraf zu Neuhaus gesamten rat vor uns gar und genzleich vertetiget, also daz der vorgenant Rittperger noch sein sun Purchart weder ander seine erben noch sein vreund, weder all sein afterchunft an den vorgenanten hof fu^erbas ewigleich kain recht noch ansprach sullen haben weder chunftig gewinnen, darum ze einer bezzern sicherhait und gedechtnus war dieselb beschaiden dem obgenannten Rittperger und seinen sun erleichterung (sic), der si genzleich gericht seint, und die vorgenanten hern sullen denselben hof mit allen nuz fu^erbas unversprochentlich inhaben in aller der mass, als ander der rechts und freis aigen. daz die ta^etigung und dise red also stet und unzebrochen beleib ewiglich, dar u^eber ze einen sichtigen urchunt geben wir den oft genanten hern und dem gotzhaus ze Engelcell disen brief mit unsern insigel gesigelten mit den zeugen, die hernach genant seint, daz sein die obgenante zwen ritter her Albert von Porzhaim, und her Pernhart von Gneiss von dem Neuhaus, der Hauser ze den zeiten purchgraf ze Stauf, Cunrat der Polzl, Seibot der Angrer, Jans der Chelner ze Schaunberg, Cunrat der Amman von Prambach und ander biderb leut genug, denen die sach auch wol chunt und gewisen ist. diser prief ist geben ze Schaunberg, do von Christes gepurt waren dreuzehen hundert iar darnach in den acht und dreusigsten iar an den negsten Freitag nach des heiligen Kreuztag, als es erfunden war.

Source Fulltext: OÖUB 6 (Wien 1872), Nr. 263, S. 266f.