Ich Friedreich der Mautter von Purchausen ze den zeiten phleger ze Scherding vergich offenbar mit disem prief und tun chunt allen den, di in sehent oder ho^erent lesen, daz ich mit wolverdachtem muet und gueten willen durich lieb dem gotzhaus und den erbern geistleichen hern datz Engelcell ledigleich han gegeben mein drew guet, di ich von dem erbern hern Graf Jansen von Hals ze lehen han gehabt, daz ist den hof datz Trawnolting und ain guet ze Rewting und ze Ripperig ains allein gelegen in Nodernpekcher pharr mit allen dem, daz dazu geho^ert ze holz und ze velde, besucht und unbesucht, und daz ist geschehen mit verha^enchnuzz und gunst des egenanten hern grafen Jansen von Hals, der sich derselben aigenschaft, di er an denselben gueten gehabt hat, genzleich hat verzigen hinz denselben gotzhaus, also beschaidentlich, daz di oben genanten hern ze Engelcell die vorgeschriben gueter mir widerleit haben mit den gueten, di hernach genant werdent, daz ist ze Chirichpach ains, ze Chrotendorf ains, ze Sundorf ains, ze Ekkolshaim ains und ze Slatberg ains, die ich von dem oftgenanten hern graf Jansen von Hals ze lehen han auf emphangen, in allen den rechten und ich diu vorder guet von im ze lehen han gehabt, ich schol auch der vorgenanten dreyer guet, di ich dem gotzhaus und den hern ze Engelcell geben han, gewer sein hinz allen leuten mit samt meinen erben an aller der stat, do in sein durft geschiecht alz landes recht izt. daz daz also stet und unverchert beleib, dar uber gib ich den oben genanten gotzhaus und den hern ze Engelcell ze urchunde disen prief mit meinen anhangenden insigel gesigelten. daz ist auch geschechen, do von Christes gepurde ergangen warn dreuzehenhundert jar darnach in dem viertzigsten jar an sand Augustinestage.

Source Fulltext: OÖUB 6 (Wien 1872), Nr. 343, S. 348