Wir pruder Hainreich ze den zeiten Abpt vnd der Conuent gemain dez gotzhaus ze Engelzell veriehen vnd tu^en chunt offenlich an disem brief, Daz vns der Edel vnd Hochgeporn furst Herczog Ott selig in osterrich mit wolverdachtem muet ze der zeit, do er iz wol getun mocht, geschaffet hat zv seinem jartagch Sechtzigch pfunt pfening wienner munzze, der wier nach seinem tott gentzleich gewert sein, Vnd dar vmb so verpinten wier vns mitt disem Brief, Daz wier vnd alle vnser nachomen in vnserm Chloster furbaz ewichleichen alle jar dez nechsten Eritages nach dem Suntag, als man singet Inuocauit. seinem jartagch wegen schullen Mit vigili, mit sel mess vnd mitt einem gantzen dienst mal den herren vnd den pru°dern vber den Tisch dez eegenanten Hertzogen Otten saeligen sel vnd allen seinen vordern ze einem Ewigen selgeret. Wer aber, daz wier vnd vnser nachomen dhaines jares den jartag also nicht wegiengen, vns irre dann aehaft nott, so schol vns der vorgenant Edel vnd hochgeporn fu^erst Hertzog Albrecht oder swer dann hertzog in Osterrich ist, haizzen pfenten auf vnserm hoff ze Chrems, als verre daz von den selben phanden allez daz gepezzert werd, daz vor an dem jartag versaumpt ist. Vnd dez ze vrchunde geben wier dem oftgenanten vnd hochgeporn Hertzog Albrechten vnd allen seinen nachomen Disen brief versigelten mitt vnsern jnsigeln. Diser brief ist geben nach Christes geburd vber Dreutzehen hundert jar, dar nach in dem ainen vnd fiertzigisten jar an der ainlef Tausent maid tach.

Source Fulltext: OÖUB 6 (Wien 1872), Nr. 390, S. 394f.