Wir Albert von Gotes gnaden Herzog ze Oesterreich, ze Steyr und ze Kernden tuen chunt offenlich mit disem brief, daz wir den geistlichen leuten . . dem abtt und . . . dem convent ze Engelhartzell darumb, daz ir gothaus destobaz widerchomen mug, di gnad getan haben und tuen auch mit disen brief, daz si von disem heuntigen tag, als der brief geben ist, uber zehen ganzer jar nach einander vrey und ledig sein sullen von aller gastung. daruber gebieten wir unsern getrewen allen unsern lantherren, rittern und chnechten, wi die genant sint und auch allen anderen edeln und unedeln, den der brief getzaigt wird, ernstlich und wellen, daz si di vorgeschriben geistleichen leut di vorgenanten zehen iar mit chainerlay gastung nicht engen oder beschwern in chain weg, swer ez daruber tet, daz wer genzlich wider uns. des geben wir ze urchund disen brief besigelten mit unseim insigel. Geben ze Newnburch bei dem In an eritag in der phingstwochen nach Christes geburd dreutzehen hundert jar, darnach in dem fu^enf und viertzkisten iar.

Source Fulltext: OÖUB 6 (Wien 1872), Nr. 509, S. 513